भांगरभूंय | प्रतिनिधी
म्हापशें, प्रतिनिधी ः 2047 मेरेन गोंयांत उदकाचो उणाव आसचो ना, हें आमचे लक्ष्य आसा. 2025 वर्सा साळ – दिवचले एक प्रकल्प हाडटात जाका लागून पिळर्ण मेरेन कच्चें उदक मेळपाक मजत जातली अशी म्हायती जलस्रोत मंत्री सुभाष शिरोडकार हांणी दिली.
कोयमावाडो, हळदोण्यां जलस्रोत खात्यान बांदिल्ल्या तळ्याचें उक्तावण केल्या उपरांत मंत्री शिरोडकार उलयताले. ह्या वेळार आमदार अॅड. कार्लुस फेरेरा, कोमुनिदाद अध्यक्ष मेल्विन फर्नांडिस, पंच वांगडी आनी शेतकार हाजीर आशिल्ले.
बांदाक लागून अंदूं उदका पुरवण करपाक कांय समस्या निर्माण जातल्यो. कारण ह्या बंदाऱ्याक 7 ते 8 म्हयने लागतले. कानालांचे काम हातांत घेतले ते खातीर हें काम बंद करतले अशें मंत्री शिरोडकार हांणी सांगलें.
एकदां हें काम जाले उपरांत फुडल्या 10 वर्सां खातीर कसलोच त्रास जावचो ना. अंजुने धरण आनी कानलाच्या कामा खातीर सुमार 300 कोटी रुपयाचो प्रस्ताव केंद्र सरकाराक धाडला. तातूंतल्यान नवनिर्माणाचें काम आधुनीक पद्दतीन जातलें. तशेंच जलस्त्रोत खातें उदरगतीच्या कामांत भेदभाव करना. शेतकारांक आमचें पयलें प्राधान्य. चार हजार शेतकार कुटुंबां आसात आनी तांकां जाय ती मजत आमी दिवपाक तयार आसात अशें शिरोडकार हांणी सांगलें.
फाटल्या वर्सा डिसेंबरांत मंत्री शिरोडकार हांणी हळदोणा मतदारसंघाक भेट दिल्ली. त्या वेळार तांणी ही सुवात पळयल्ली आनी तळ्याची सोबीतकाय करपाची हमी दिल्ली आनी मे म्हयन्या मेरेन विक्रमी काळांत ते काम पुराय केले अशें आमदार अॅड. फेरेरा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
