भांगरभूंय | प्रतिनिधी
नवी दिल्ली, खबरां संस्था ः भारताच्या गांवगिऱ्या वाठारांनी पांच वर्सांत म्हयन्याळ्या उत्पन्नांत 57.5% वाड जाल्या. गांवगिऱ्या वाठारांनी 2016-17 वर्सा सरासरी म्हयन्याळी घरगुती उत्पन्न 8,059 रुपया आशिल्लें. 2021-22 वर्सा दर म्हयन्याक 12,698 रुपया जालें. पूण ह्या काळांत थकीत रिणां 47.4 टक्क्यां वयल्यान 52 टक्क्यां मेरेन वाडलीं. बुधवारा जाहीर केल्ल्या नाबार्डाच्या ऑल इंडिया फायनॅन्शियल इनक्लुझन सर्वेक्षणांतल्यान (एनएएफआयएस) ही म्हायती मेळ्ळ्या.
सर्वेक्षणाच्या मतान गांवगिऱ्या वाठारांनी म्हयन्याळे उत्पन वर्सुकी 9.5 टक्क्यांनी वाडत आसा. ते देशाच्या नाॅमिनल जीडीपी ग्रोथ रेट 9% परस चड आसा. जाल्यार गांवगिऱ्या वाठारांचो म्हयन्याळो खर्च 2016-17 वर्सा 6,646 रुपया आशिल्लो तो 2021-22 वर्सा म्हयन्याक 11,262 रुपया जालो. गांवगिऱ्या वाठारांतल्या एक लाख घरांच्या अर्थीक स्थिती विशीं म्हायतीच्या आदाराचेर सर्वेक्षण तयार केल्लें. हातूंतले 56.7 % लोक शेतकार कुटुंबांतले आनी उरिल्ले बिगर शेतकार कुटुंबांतले आशिल्लें.
मेळिल्ल्या उत्पनांतल्यान खाणा- जेवणाचेर जावपी खर्चाचो वांटो उणो जाला. पांच वर्सांत तो 51% वयल्यान 47% मेरेन देंवला. गांवगिऱ्या वाठारांनी शेतवडींतल्यान मेळपी उत्पनाचो वाटो 35 टक्क्यांवयल्यान 20 टक्क्यांमेरेन उणो जाला. पगार आनी मजुरींतल्यान मेळपी उत्पन्नाचो वाटो वाडला.
सर्वेक्षणा प्रमाण 2021-22 वर्सा गांवगिऱ्या कुटुंबाची म्हयन्याळी अर्थीक बचत 13.209 रुपया आशिल्ली. जी 2016-17 वर्सा म्हयन्याक रुपया 9.104 आशिल्ली. सर्वेक्षणांत वांटो घेतिलल्या एक लाख लोकां मदल्या 66% लोकां कडेन कांय प्रमाणांत बचत आशिल्ली. 2016-17 वर्सा अशा कुटुंबाचो आंकडो फकत 50.6% आशिल्लो. अर्थीक संस्थां कडल्यान रीण घेवपी शेतकारांचो आंकडो 2016-17 वर्सा 60.5% आशिल्लो. 2021-22 वर्सा तो 75% मेरेन वाडलो. हाचो अर्थ गांवगिऱ्या वाठारांनी शेतवडी खातीर खाजगी सावकारां कडल्यान रीण घेवपी शेतकारांचो आंकडो उणो जाला. 23.5% कुटुंबातल्या उण्यांत एक वांगड्याक पेन्शन मेळटा. 2016-17 वर्सा अशी कुटुंबा फकत 18.9 टक्के आशिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
