निहॉन हिदानक्यो संस्थेक शांततायेचो नोबेल पुरस्कार

भांगरभूंय | प्रतिनिधी

टोक्यो, खबरां संस्था ः फाटल्या कांय दिसां सावन नोबेल पुरस्कारांची घोशणा जाता. आतां मेरेन भौतिकशास्र, साहित्य आनी वैजकी मळावेले नोबेल पुरस्कार जाहीर जाल्यात. आतां शांततायेचो नोबेल पुरस्कार जाहीर जाला. हो पुरस्कार जपानी संस्थेक फावो जाला अशें नोबेल पुरस्कार समितीन सांगलां. हे समितीन एक्स सोशल मिडियाचेर पोस्ट करून हे संबंदी म्हायती दिली.
नोबेल पुरस्कार समितीन केल्ल्या पोस्टा प्रमाण अंदूंचो शांततायेचो नोबेल पुरस्कार निहॉन हिदानक्यो ह्या जपानी संस्थेक फावो जाला. हिरोशिमा आनी नागासाकी हांगाच्या अणूबॉम्ब पीडित लोकां खातीर हे संस्थेन खूब आनी व्हड काम केला. ही संस्था संवसार अण्वस्त्र मुक्त करपा खातीर वावुरता. हो पुरस्कार तांच्या वावराक मान दिवपा खातीर दिला.
जोन हॉपफील्ड आनी जिओफ्री हिंटन हांकां भौतिकशास्त्रातलो नोबेल पुरस्कार फावो जालो. भौतिकशास्त्रातल्या संकल्पनांचो वापर करून ‘मशीन लर्निंग’ ह्या मळार केल्ल्या वावराक हो पुरस्कार तांकां दितले. तांच्या ह्या संशोधनाक लागून कृत्रिम बुद्धिमत्तेच्या (AI) मळार उदरगत करपाक मजत जातली.