भांगरभूंय | प्रतिनिधी
नागपूरांत मनयलो संघाचो स्थापना दीस
नागपूर, खबरां संस्था : ओटीटी प्लॅटफाॅर्माचेर जें कितें दाखयतात, ते विशीं सांगपूय अभद्र थारतलें इतलें तें बुरशें आसता. ताकाच लागून हांव म्हणटा की ह्या सगल्यांचेर कायद्यानूय नियंत्रण दवरपाची गरज आसा. संस्कार भ्रश्ट जावपा फाटलें तेंय एक व्हडलें कारण आसा, अशें राष्ट्रीय स्वयंसेवक संघाचे सरसंघचालक मोहन भागवत हांणी सांगलें. दसऱ्या निमतान हांगाच्या संघ मुख्यालयांत ते उलयताले. संघ अंदूं स्थापनेच्या १०० व्या वर्सांत पावल दवरता.
ओटीटी प्लॅटफाॅर्माचेर सगल्या भाशांतल्यान वेबसिरीज, सिनेमा, म्हायतीपट आनी हेर व्हिडियो पळोवपाक मेळटात. ताचेर भागवत हांणी केल्लें उलोवप सोशल मिडियाचेर चर्चेचो विशय थारलां.
शाळा- म्हाविद्यालयांनी शिक्षण म्हणल्यार प्रबोधन, वाचन, आयकप जाता. थंय जें कितें शिकयतात, ताचें उदाहरण शिक्षक आसपाक जाय. थंयच्यान सुरवात करची पडटली. तांकां प्रशिक्षण दिवचें पडटलें. शिक्षण म्हत्वाचें आसा, तरी पिरायेच्या तीन ते १२ वर्सां मेरेन घरांनी जावपी संस्कारांतल्यान, प्रसंगांतल्यान व्यक्तीची मनोभुमिका तयार जाता. त्या आधाराचेरुच मनशाची जीणभराची वाटचाल जाता, अशें तांणी सांगलें.
घर, शिक्षण संस्थां वांगडाच समाजीक वातावरणूय म्हत्वाचें आसता. समाजांक जे आदर्श घेवपाक सारके मनीस आसतात, ते जे तरेन वागतात, तशेच सामान्य लोक वागतात. भोवतेक सामान्य मनीस विचार करपाचे भानगडींत पडनात. तांकां ती तांकूय नासता. तांकां तें कळयना. जे लोकप्रीय आसात, प्रभावी आसात, ते सांगतात, करतात तशेंच सामान्य लोक सांगतात, करतात. ताका लागून प्रभावी लोकांक हाची काळजी आसपक जाय, अशें भागवत हांणी सांगलें.
प्रसार माध्यमांनीय जापसालदारकेचें वर्तन दवरपाक जाय. आपले दरेके कृतींतल्यान समाजाची धारणा, मांगल्य कायम राखपी मुल्यांचें पोशण जावपाक जाय, हाचो हुस्को समाजाची मानसिकताय तयार करपाचें म्हत्वाचें काम करपी माध्यमांक आसपाक जाय. निदान ह्या गजालींत धक्को लागतलो अशें काम तांणी करपाक जायना, अशें तांणी सांगलें.
बांगलादेशांत भारत विरोधी घडणुको घडपाक लागल्यात. थंयच्या हिंदूं आड हिंसाचार जावंक लागला. धर्मांध लोक आनी भारताचे उदरगतीक धोको आशिल्ल्यांचेर बारीकसाणेन नदर दवपाची गरज आसा, अशें तांणी सांगलें.
‘धर्म’म्हणल्यार भारताचे अर्क (इसेन्स). धर्म म्हणल्यार ‘रिलीजन’ न्हय. आमच्या देशांत साबार धर्मांतलें अध्यात्म एकमेकांक जोडटा. तो खरो धर्म. हिंदू धर्म हो हालींच सोदून काडिल्लो वा तयार केल्लो न्हय, तर तो सगल्या मनीसजातीं खातीरचो पयलीं सावन चलत आयिल्लो धर्म, तो संवसाराचो धर्म. धर्म म्हणल्यार भारताची सेवा, तो जात, धर्म (रिलीजन) न्हय, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
