भांगरभूंय | प्रतिनिधी
ओपनर सुयश प्रभुदेसायाचो शेंकडो आनी मुखेली दर्शन मिशाळाच्या अर्द शेंकड्या नेटार येजमान गोंय पंगडान रणजी प्लेट गटांत मणिपूर पंगडा आड चार दिसांचे लडतीच्या पयल्या दिसा पयल्या डावांत 7 विकेटी व्हगडावन 302 धांवड्यो केल्यात.
पर्वरी क्रिकेट अकादमीचेर काल सावन मॅचीक सुरवात जाली. मणिपूरान टॉस जिखून गोंयाक पयलीं बॅटींग करपाचें आमंत्रण दिलें. रोहन कदम (4), मंथन खुटकार (8) आनी के व्ही सिद्धार्थ (14) हे बॅट्समन सवाय भितर बाद जाले. 3 बाद 76 धांवड्यां वयल्यान सुयश प्रभुदेसाय आनी स्नेहल कवठणकार (41) हांणी गोंयचो डाव सांबाळ्ळो. तांणी चवथे विकेटी खातीर 94 धांवड्यांची भागिदारी केली.
स्नेहल बाद जाल्या उपरांत सुयश आनी दर्शन मिशाळ हांणी पांचवे विकेटी खातीर 43 धांवड्यांची भागिदारी केली. सुयशाची खेळी रोनाल्डोन सोंपयली. फिरोईजाम ज्योतीन सिंग हाणें ताची कॅच धरली. सुयशान 35वे पयले श्रेणीचे मॅचींत खेळटना सवो शेंकडो नोंदयलो. ते उपरांत दर्शन मिशाळ आनी समर दुभाषी हांणी सवे विकेटी खातीर 80 धांवड्यांची भागिदारी करून गोंयचो डाव घटमूट केलो. मिशाळ आनी मोहीत रेडकार हांकां राजकुमार रॅक्स सिंगान बाद केले.
मिशाळान 84 बॉलांनी 51 धांवड्यो केल्यो. हातूंत पांच चवक्यांचो आनी एका सक्याचो आस्पाव आशिल्लो.
पयल्या दिसाचो खेळ सोंपलो त्या वेळार समर दुभाषी 39 धांवड्यो करून खेळपट्टीचेर आशिल्लो. ताच्या वांगडा ऋत्विक नायक मैदानांत आसा. मणिपूरा वतीन राजकुमार रॅक्स सिंग आनी प्रियोजीत कांगाबाम सिंग हाणें दरेकी 2 जाल्यार जोतीन सिंग आनी लॉंगजाम रोनाल्ड मिती हाणें एकेक विकेट घेतली.
धांवतकटोः गोंय, (पयलो डाव) 87 ओव्हरींनी 7 बाद 302 धांवड्यो, ( रोहन कदम कॅ आनी बॉ ज्योतीन सिंग 4, सुयश प्रभुदेसाय कॅ ज्योतीन सिंग बॉ एम रोनाल्ड 120, मंथन खुटकार कॅ रोनाल्ड बॉ प्रियोजीत सिंग 8, के व्ही सिद्धार्थ एलबीडब्ल्यू बॉ अजय सिंग 14, स्नेहल कवठणकार कॅ प्रफुल्लोमणी बॉ प्रियोजीत सिंग 41, दर्शन मिशाळ कॅ प्रफुल्लोमणी बॉ रॅक्स सिंग 51, समर दुभाषी खेळटा 39, मोहीत रेडकार कॅ जोन्सन सिंग बॉ रॅक्स सिंग 5, ऋत्विक नायक खेळटा 1 धांवडी).
बॉलींगः रेक्स सिंग 15-2-34-2, ज्योतीन सिंग 16-5-34-1, बिश्वोरजीत सिंग 12-2-44-0, प्रियोजीत सिंग 17-3-35-2, अजय सिंग 17-2-78-1, रोनाल्ड मिती 10-0-58-1.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
