भांगरभूंय | प्रतिनिधी
दसऱ्याक रोजांच्या उत्पादनांत अंदूं उणाव
पणजी: शेती, बागायती सयत अंदूं रोजांच्या फुलांचे लागवडीक लेगीत पावसाचो फटको बसला. व्हड प्रमाणात रोजांच्या फुलांची लागवड करपी शेतकारां कडल्यान ही म्हायती मेळ्ळी. सखल भागांत पावसाचें उदक सांचून राविल्ल्यान रोजांच्या रोंपाचीं मुळां कुसलीं. हाका लागून दसऱ्याक 25 टक्के तरी उत्पादनांत उणाव जातलो, असो अदमास शेतकी खात्याचे संचालक संदीप फळदेसाय हांणी उक्तायलो. उत्पादनांत नेमको कितलो उणाव जातलो, ते दसऱ्या उपरांतूच कळटलें अशें तांणी सांगलें.
चवथ, दिवाळी भशेन दसरो हो एक हिंदूंचो म्हत्वाचो सण. साडेतीन म्हुर्ता मदलो एक आशिल्लो दसरो गोंयकार भाव आयज व्हड उमेदीन मनयतात. दसरो, दिवाळी, संवसार पाडव्याक रोजांक व्हड म्हत्व आसा. ह्या सणा निमतान रोजांची सगल्यांत चड विक्री जाता. दसऱ्याचे आदले दीस रस्त्याचे कुशीक तशेंच बाजारांत रोजांच्यो राशीच दिश्टी पडटाल्यो. 100 ते 150 रुपया किलान विकप जातालें. चडशीं रोजां भायल्या राज्यांतल्यान येत आसलीं तरी गोंयांतले शेतकार आतां रोजांची लागवड व्हड प्रमाणांत करतात. राज्यांत 25 हॅक्टर जमनींत 285 शेतकार व्हड प्रमाणांत रोजांची लागवड करतात. फाटल्या वर्सा 125 मेट्रीक टन रोजांचे उत्पादन जाल्लें अशी म्हायती शेतकी खात्या कडल्यान मेळ्ळी. अंदूं मात पावसाक लागून दसऱ्याक तरी चड रोजां जालीं ना, अशी म्हायती शेतकारांनी दिली.
सखल भागांत पावसाचें उदक सांचून उरलें. हाका लागून रोजांच्या रोंपांचीं मुळां कुसलीं. दोंगराळ वाठारांतल्या रोपांक पावसाचो फटको बसूंक ना, अशें शेतकी संचालक संदीप फळदेसाय हांणी सांगलें.
पावसाक लागून म्हजी सगलीं रोंपां पेड्डेर जालीं. दसऱ्याक विकपा खातीर रोजाच नात, अशें सांवड्डेंचे शेतकार वरद सामंत हांणी सांगलें. फाटल्या वर्सा 100 किला परस चड रोजांची विक्री जाल्ली. सध्या दसऱ्याक म्हजे कडेन 10 कील रोजां नात, अशें मेणकुरेचे शेतकार अमर नायक हांणी सांगलें.
बार्शें वाठारात शिवशक्ती आपमजत गटान व्हड प्रमाणांत रोजांची लागवड केल्या. आपमजत गट आनी शेतकारांक आमी 10 हजार रोजांच्या रोंपांचें वांटप केलां. दसऱ्याक 500 किला परस चड रोजां मेळटलीं अशी आस्त शिवशक्ती आपमजत गटाच्यो मुखेली विशाखा वेळीप हांणी उक्तायली. केप्यां डॉ. राजेंद्र तांबा हांणी लेगीत व्हड प्रमाणांत रोजांची लागवड केल्या.
रोजांची रोंपां लायले उपरांत 65 दिसांनी फुलां जातात. पावसाक लागून अंदूं दसऱ्याक फाटल्या वर्सा परस उणें उत्पादन जातलें. दिवाळी आनी उपरांत संवसार पाडव्याक मात रोजांचे पीक बरें येतलें, अशें शेतकी संचालक संदीप फळदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
