भांगरभूंय | प्रतिनिधी
442 ग्रॅम भांगर जप्त, 100 ग्रॅम भांगर जप्त करपाची प्रक्रिया सुरू
म्हापशें, प्रतिनिधी ः पर्वरी पुलिसांनी धरिल्ल्या म्होंवाळीं घालून घरां फोडपी टोळयेन 7 म्हयन्यांत 70 परस अदीक घरां फोडल्यांत. फेब्रुवारी ते सप्टेंबर ह्या काळांत ह्या टोळयेन एक कोटी वयर रुपया लुटले. बार्देस, तिसवाडी, फोंडें आनी मुरगांव ह्या चार म्हालांतले बंगले आनी फ्लॅटांक तांणी लक्ष्य केलें. चोरी प्रकरणांत आनीक दोग जाणांक अटक केली. मजगतीं, मारियो सांताना बाप्तिस्ता उर्फ सांतान (44, ग्रॅण्ड पेडे, बाणावली) हाणें चवकशे वेळार आपूणच मास्टरमायंड आशिल्ल्याची पुलिसांक कबूली दिल्या.
राज्यांतल्या वेगवेगळ्या वाठारांतल्यान लुटिल्ले भांगर फिलीप राटो हाचे कडेन दिलें आनी ताणें ते समर पाल ह्या भांगराच्यो वस्ती करपी कारागिरा कडेन दिले अशेंय ताणें सांगलें. ‘मास्क मॅन’ मारियो बाप्तिस्तान दिल्ले म्हायतीचेर आदारुन पुलिसांनी ताच्या टोळयेन चोरिल्ले 442 ग्राम भांगर मडगांवचो सुवर्णकार दीपक बांदोडकार आनी कारागीर समर पाल हांचे कडल्यान जप्त केलें. जाल्यार 100 ग्रॅम विकिल्लें भांगर जप्त करपाची प्रक्रिया सुरू आसा अशी म्हायती पुलीस अधीक्षक अक्षत कौशल हांणी दिली.
चवकशे वेळार राज्यांतल्या वेगवेगळ्या पुलीस स्टेशनांच्या मर्यादे भितर नोंद जाल्ल्या घर फोडपाच्या 19 प्रकरणांत बाप्तिस्ता टोळयेचो आस्पाव आशिल्ल्याचें दिसून आयलां. मेळिल्ले म्हायती प्रमाण, पर्वरी पुलीस स्टेशनांत 4, पणजी पुलीस स्टेशनांत 4, आगशी पुलीस स्टेशनांत 2, म्हापशें पुलीस स्टेशनांत 1, हणजूणां पुलीस स्टेशनांत 2, फोंडें पुलीस स्टेशनांत सगळ्यांत चड 5 आनी पोरणें गोंय पुलीस स्टेशनांत 1 प्रकरणांचो आस्पाव आसा. ह्या चोरांक खंय खंय चोरयो केल्यात हें लेगीत याद येना. व्हड प्रमाणांत घरां फोडून चोरयो केल्ल्यान तांचे कडल्यान म्हायती मेळोवप हें पर्वरी पुलिसांक व्हड आव्हान आसा.
पॉश घरांक टोळयेन केल्लें लक्ष्य…
मजगतीं, पर्वरी, म्हापशें, शिवोली, साळगांव, नागाळी, दोनापावल, मेरशी, बांबोली, वेळसांव- पाळी आनी फोंडें वाठारांतल्या पॉश घरांक ह्या चोरांनी लक्ष्य केल्लें. घरां फोडून लुटपी टोळयेन गोंय पुलिसांक आव्हान दिल्लें. पर्वरी पुलिसांच्या यत्नांक लागून टोळी सांपडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
