भांगरभूंय | प्रतिनिधी
नवी दिल्ली, खबरां संस्था ः नॅशनल कमिशन फॉर प्रोटेक्शन ऑफ चायल्ड रायट्सान (NCPCR) बिरेस्तारा 2023- 24 वर्सा बालविवाहाच्या धोक्यांत आशिल्ल्या 11 लाख भुरग्यांची वळख पटोवन अहवाल जाहीर केलो.
आयोगाच्या म्हणण्या प्रमाण, उत्तर प्रदेशांत 5 लाखां परस चड भुरगीं आसात जांकां बालविवाहाचो धोको आसा. बालविवाह आडावपा खातीर अधिकारी, जिल्लो प्राधिकरण आनी हेर संबंदीत संघटनांच्या सहकारान बालविवाह प्रतिबंधक कायदो, 2006 खाला जायतीं पावलां उबारल्यांत अशी म्हायती एनसीपीसीआरान दिल्या. तशेंच कुटुंबीक समुपदेशन, भुरग्यांक परतून शाळांनी प्रवेश दिवप आनी कायदेशीर संस्थांच्या मजतीन बालविवाह आडावपाचे यत्न सुरू आसात अशें आयोगान सांगलें.
जायत्या बसके उपरांत हो अहवाल तयार केलां. जातूंत जिल्लो अधिकारी आनी हेर संबंदीत अधिकाऱ्यां कडेन संवाद सादलो. ह्या अहवालांत शाळा सोडपाचो धोको आशिल्ल्या भुरग्यांची आंकडेवारी सादर केली. शाळा सोडप हो बालविवाहांतलो एक मुखेल घटक. खंयचीं भुरगीं चड गैरहाजीर आसात तें पळोवपा खातीर आयोगान सलग 30 दीस शाळांचेर नदर दवरली. तशेंच आयोगान शाळा अधिकाऱ्यां कडेन संवाद सादलो आनी शाळा सोडपी भुरग्यांचेर नदर दवरली.
आयोगाच्या अधिकाऱ्यांनी जागृताय निर्माण करपा खातीर आनी बालविवाह आडावपा खातीर कर्नाटक आनी आसाम सारक्या राज्यांतले धर्मीक फुडारी, लग्न सुवाळे आनी आंगणवाडी सेविक अशा मुखेल थळाव्या व्यक्तीं वांगडा 40 हजारां परस चड बसका घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
