भांगरभूंय | प्रतिनिधी
नवी दिल्ली, खबरां संस्था ः अंदूं ग्लोबल हंगर इंडेक्स 2024 चे (जीएचआय) वळेरेंत 127 देशां मदीं भारत 105 वे सुवातेर आसा. फाटल्या वर्सा 125 देशां मदीं 111 तर 2022 वर्सा 121 देशां मदीं 107 वे सुवातेर आशिल्लो. हाचोच अर्थ अंदूं परिस्थिती मध्यम आसा. पूण उपासमारी निर्देशांकाचे गूण अजूनय 27.3 आसात जे गंभीर आसात.
पाकिस्तान आनी अफगाणिस्तानाची स्थिती भारता परस वायट आसा. पूण नेपाळ, बांगलादेश, कंबोडिया, फिजी, श्रीलंका आपल्या लोकांक उपासमारींतल्यान वाटावपाचे नदरेन भारता परस मुखार आसात.
जीएचआय गूण कशें मेजतात?
दरेका देशाचो जीएचआय गूण कुपोशण, भुरग्यांक मरण आनी बाल कुपोशण ह्या 3 आयामांच्या 4 स्केलाचेर मेजतात. बाल कुपोशणांत दोन वर्ग आसात – चायल्ड वेस्टिंग आनी चायल्ड स्टंटिंग.
१. कुपोशण: कुपोशण म्हळ्यार निरोगी मनशाक दीसभर गरजेचीं कॅलरीज मेळनात. दिसाक फावो ती कॅलरीज मेळनाशिल्ल्या वट्ट लोकसंख्येचें प्रमाण मेजतात.
२. भुरग्यांचे मरण (बालमृत्यू): दर 1,000 जल्माक आयिल्ल्या फाटल्यान 5 वर्सां सकयल्या भुरग्यांक मरण येवपी भुरग्यांचो आंकडो म्हळ्यार भुरग्यांचे मरण.
३. भुरग्यांचे कुपोशण: हांतूत दोन वर्ग आसात –
० चायल्ड वेस्टिंग : चाइल्ड वेस्टिंग म्हळायर भुरगो ताच्या पिरायेप्रमाण चड पातळ वा दुबळो आसप. 5 वर्सां सकयली भुरगीं, जांचे वजन तांचे उंचाये परस उणें आसता. हाचे वयल्यान त्या भुरग्यांक फावो त्या प्रमाणांत पोशण मेळूंक नाशिल्ल्यान दुबळीं आसात हें स्पश्ट जाता.
० चायल्ड स्टंटिंग ः चायल्ड स्टंटिंग म्हळ्यार ज्या भुरग्यांची उंचाय तांच्या पिराये परस उणी आसता. हाचो अर्थ पिराये प्रमाण भुरग्याची उंचाय वाडूंक ना. उंचायेचो सरळ संबंद पोशणा कडेन आसता. ज्या भुरग्यांक दीर्घकाळ पोशण उणे आसात, त्या भुरग्यां मदीं स्टंटिंगाची समस्या आसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
