भांगरभूंय | प्रतिनिधी
खबरां संस्था, कोरिया: दक्षिण कोरियाची लेखिका हान कांग (५३) हांकां बिरेस्तारा साहित्याचें नोबेल जाहीर जालें. ‘तिच्या काळजाक स्पर्श करपी इतिहासाच्यो वेदना तिच्या काव्यांतल्यान पळोवंक मेळटात. मनशाचें जिवीत कितलें अस्थीर आसा तें तातूंतल्यान दिसून येता’ अशें नोबेल समितीन सांगलें.
स्वीडिश ऍकॅडमीच्या नोबेल समितीचे कायमस्वरूपी सचिव मॅट्स माम हांणी पुरस्काराची घोशणा केली. नोबेल समितीचे अध्यक्ष अँडर्स ऑल्सन हांणी तिका परबीं भेटयलीं. बायलांची असुरक्षितताय, बायलांची जीण हे विशीं हान कायमूच सक्रीय आसतात, अशी प्रतिक्रिया तांणी दिली.
नोबेल पुरस्कार मेळपी हान ही पयली आशियायी बायल आनी दक्षिण कोरियांतली पयली बायल लेखिका थारल्या. दक्षीण कोरियेंत नोबेल जिंकपी ती दुसरी. दक्षिण कोरियाचे आदले अध्यक्ष किम दाइ जंग हांकां २००० वर्सा शांतिकायेचो पुरस्कार फावो जाल्लो. दक्षिण कोरियांत लोकशाय प्रस्थापीत करपाचो तांणी यत्न केल्लो.
कांग हांकां तिच्या ‘द व्हेजिटेरियन’ हे कादंबरीक आंतरराष्ट्रीय बुकर सन्मान २०१६ त जाहीर जाल्लो. एके बायलेचें मांस खावप आडोवपाच्या निर्णयाचेर विचित्र अशे जावपी परिणाम सांगपी ही कांदबरी.
कांग १९९३ सावन साहित्य मळार
दक्षिण कोरियांतल्या ग्वांग्जू शारांत १९७०त कांग हिचो जल्म जालो. लेखनाची संवय तिका घरांतल्यानूच लागली. तिचो बापूय कादंबरीकार आशिल्ले. तांणी सुरवातेक कविता केल्यो. उपरांत कथे वरवीं बरोवपाक सुरवात केली. हान १९९३ वर्सा कवयित्री म्हणून सगळ्यां मुखार आयली. तिचो पयलो कथासंग्रह १९९४त उजवाडाक आयलो. १९९८ त तिणें ‘ब्लॅक डिअर’ ही पयली कादंबरी बरयली. ‘द व्हेजिटेरियन’, ‘ग्रीक लेसन्स’, ‘ह्युमन ऍक्ट्स’ आनी ‘द व्हाइट बुक’ हाचें तिणें इंग्लीशींत भाशांतर केलां. ‘वुई डू नॉट पार्ट’ ही तांची नवी कादंबरी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
