भांगरभूंय | प्रतिनिधी
मडगांव: हाचे मुखार मडगांव पालिकेंतली एखादी फायल गायब जाली असो प्रकार जावचो न्हय. ही पालिका कर्मचाऱ्यांक ताकीद आसा. फायल गायब जाल्यार ताची जापसालदारकी कर्मचाऱ्यांचेर निश्चीतपणान करतले. पालिका कामकाजांत सुदारणा करून पारदर्शकपणान वेव्हार दवरून लोकांक बरी सेवा दिवची अशें आमदार दिगंबर कामत हांणी सांगलें.
मडगांव पालिकेंतल्या कार्यावळी वेळार आमदार दिगंबर कामत हांणी पालिका कर्मचाऱ्यांचे कार्यपद्दती सयत फायली गायब जावपाच्या प्रकाराचेर उलोवप केलें.
कामत हांणी म्हणलें, बरें प्रशासन कशें थारायतले जाल्यार ते खातीर कांय घटकांचेर लक्ष दितात. पंचायत, पालिका, पुलीस स्टेशन, जिल्होधिकारी कचेरी आनी बस हातूंतल्या वेव्हारा वेल्यान सर्वसामान्य लोकां कडल्यान राज्यांतल्या प्रशासना विशीं मत थारायतात. मडगांव पालिका ही लोकांचे सेवेंतलो म्हत्वाचो घटक आसा. ताका लागून सेगीत येवन लेगीत कामां जायनात अशें जावचें न्हय.
नवे मुख्याधिकारी आयल्यात. पालिकेच्या कामकाजांत बदल हाडून लोकांक योग्य सेवा दिवपाची गरज आसा. हातूंत आपेस आयल्यार परतून लोकां कडेन वचून कितें सांगतले हो प्रस्न निर्माण जातलो अशें कामत हांणी म्हणलें.
नगराध्यक्ष दामू शिरोडकार बरे काम करपाचो यत्न करीत आसात. तांकां कर्मचाऱ्यां कडल्यान योग्य तो सांगात मेळपाची गरज आसा. कर्मचाऱ्यांच्या पगाराचें, बडटीचे प्रस्न सोडयल्यात. पालिका कर्मचारी खंयच्यो फायली काडटात, कोणाक त्यो दाखयतात आनी आनीक कितें करतात त्या सगल्यांची म्हायती आपणाक आसा अशें सांगून आतांच सादूर करतां बरें काम करात, लोकांक बरी सेवा दियात अशें दिगंबर कामत हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
