भांगरभूंय | प्रतिनिधी
भंडारी समाजाच्या फुडाऱ्यांची मुख्यमंत्र्यां कडेन मागणी
पणजी: वेंचणुकेंत आरक्षण दिवपा सयत हेर लाव योग्य तरेन दिवपा खातीर सरकारान राज्याची जातीनिहाय जनगणना करची, अशी मागणी भंडारी समाजाच्या फुडाऱ्यांनी केल्या. मुख्यमंत्री डॉ. प्रमोद सावंत हांची भेट घेवन तांणी तांकां निवेदन भेटयलें.
आदले मंत्री दयानंद मांद्रेंकार, दिलीप परूळेकार, अॅड. अमीत पालेकार, आदले आमदार किरण कांदोळकार, आमदार विरेश बोरकार हांचे सयत हेर फुडारी हाजीर आशिल्ले.
दरेकी 10 वर्सांनी जनगणना जाता. हाचे पयलीं 2011 वर्सा जनगणना जाल्ली. कोविडाक लागून 2021 वर्सा जनगणना जावंक ना. आता ती जावपाची गरज आसा. जातीनिहाय जनगणान जाले उपरांत एससी, एसटी तशेंच ओबीसींंचे प्रमाण कळटलें. जनगणना करपाची मागणी करपी निवेदन आमी सादर केलां अशें आदले मंत्री दयानंद मांद्रेंकार हांणी सांगलें.
जनगणने खातीर केंद्रा कडेन राज्य सरकारान फाटपुरवण करची, अशी मागणी आमी केल्या.
राज्यांत कितले एससी आसा, एसटी आसा वा भंडारी आसा, तांची म्हायती ना. हाका लागून हरवळें पंचायत वेंचणुकेंत ओबीसीक आरक्षण दिवप शक्य जालें ना. जनगणना जावप गरजेचें आसा, अशें अॅड. अमीत पालेकार हांणी सांगलें.
बसकेंत फक्त जनगणनेचेर चर्चा जाली, अशी म्हायती भंडारी समाजाच्या फुडाऱ्यांनी दिली.
जातीनिहाय जनगणनेचे मागणेक काँग्रेसीचो तेंको
जातीनिहाय जनगणनेचे मागणेक काँग्रेसीचो तेंको आसा, अशें प्रदेश काँग्रेस अध्यक्ष अमीत पाटकार हांणी स्पश्ट केलां. जातीनिहाय जनगणना 90 टक्के लोकांक तांचे हक्क मेळोवन दितली अशी भुमिका राहूल गांधी हांणी मांडल्या. ही भुमिका योग्य आशिल्ल्याचें प्रदेश काँग्रेस अध्यक्ष अमीत पाटकार हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
