भांगरभूंय | प्रतिनिधी
वास्को, प्रतिनिधी: दुकानां खातीर योग्य अशे परवाने तीन दिसां भितर दियात. ना जाल्यार दुकानां सील करतले, अशी शिटकावणी मुरगांवचे नगराध्यक्ष गिरिश बोरकार हांणी नवे वाडे हांगच्या दुकानवाल्यांक दिली.
बायणा, सडो, मांगोरहिल, नवो वाडो आनी हेर वाठारांत विंगड विंगड वस्तुंचीं दुकानां आसात. तांचे मदले जायत जाण मुरगांव पालिके कडल्यान कसलेच तरेचे परवाने घेनात. ताका लागून मुरगांव पालिकेचो व्हडा प्रमाणांत महसूल बुडटा. ह्यान पयलीं मुरगांव पालिकेन असल्या दुकानदारां आड मोहीम घडोवन तांकां योग्य ते परवाने मुरगांव पालिकेन घेवपाक लायिल्लें. ताका लागून परवान्या बगर दुकानां चलोवपाक बंदी आशिल्ली. उपरांत ही मोहीम बंद जाल्ल्यान दुकानदारांनी आपले परवाने नुतनीकरण करपा कडेन आडनदर केल्ली. ज्या दुकानदारांनी हे विशीं दखल घेतना नगराध्यक्ष बोरकार हांणी बिरेस्तारा नवो वाडो भागाक भेट दिली. ह्या वेळार तांचे वांगडा मुरगांव पालिकेचे अधिकारी, पालिका निरीक्षक, कारकून आनी हेर आशिल्ले.
हांगच्या दुकानदारांकडेन परवान्या विशीं विचारले उपरांत खुबश्या जाणांनी परवाने नाशिल्ल्याचें सांगलें. कांय जाणांनी दुकानां बंद थंयच्यान पळ काडली. हे विशीं संबंदीत दुकानदारांक तीन दिसांची मुजत दिल्या. हे मुजतींत तांणी योग्य ते परवाने मुरगांव पालिके कडल्यान घेवचे. ना जाल्यार तांच्या दुकानांक सील लायतले, अशें बोरकार हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
