बाशुदेवचें प्रकरण क्रायम ब्रांचा कडेन
भांगरभूंय | प्रतिनिधी
पणजी : तिसवाडी म्हालांतल्या सांतइस्तेव आखाड्यावेल्या फेरयेच्या धक्यार १ सप्टेंबराक घडिल्ले ते भिरांकूळ घडणुकेन सगळ्यांक नाका पुरो केलें. पोरणें गोंय पुलिसांनी सगळे तरेन बाशुदेवाचो सोद घेतलो. मात तो खंय गेलो हें कुवाडें आजूनय सुटना. आतां भंडारी कुटुंबीयांनी हें प्रकरण क्रायम ब्रांच कडेन दिवपाची मागणी केल्ली. आयज हें प्रकरण पोरणें गोंय पुलिसां कडल्यान क्रायम ब्रांचा कडेन दिवपाचो निर्णय घेतलो.
गायब आशिल्ल्या बासुदेवाचो सोद पोरणें गोंय पुलीस दर्यादेग पुलीस, उजो पालोवपी दळ, नौदळ आनी तटरक्षक दळान ड्रोनाचेय मजतीन घेवपाचो यत्न केलो. १ सप्टेंबराचे रातींच्यान तो गायब आसा. आजूनय ताचो कांयच पत्तो लागूंक ना. ह्या प्रकरणाक आतां १ म्हयनो १० दीस जाल्यात. आजूनय बाशुदेवा फाटलें गुपीत सांपडूंक नाशिल्ल्यान आतां फुडली चवकशी क्रायम ब्रांच करतलें.
मजगतीं, पोरणें गोंयच्या पुलिसांनी बाशुदेवचे गाडयेचो फाटलाव करपी बेळगांवचे ते गाडयेंतल्या लोकां कडेन चवकशी केली. मात तांकां बेपत्ता बाशुदेवची कांयच म्हायती नाशिल्ली. मजगतीं, रस्त्यावेले सीसीटीव्ही फुटेजी प्रमाण घडणुके वेळार गाडी बाशुदेवूच चलयतालो. तशेंच सांखळे ते घडणुके सुवातेर ही गाडी थारूंक नाशिल्ली, हेंय गाडयेच्या ट्रॅका वरवीं दिसून आयलें.
मजगतीं, ह्या प्रकरणांत खासदार विरियातो फर्नांडीस हांणी पत्रकारां कडेन उलयतना बाशुदेवच्या बेपत्ता प्रकरणांत वाहनांचे विशीं व्हड बोवाळ आशिल्ल्याचें म्हणलां. प्रकरणाची बरे तरेन चवकशी केल्यार हातूंत एका मंत्र्याची लिंक दिसून येतली. क्रायम ब्रांच नक्की ह्या प्रकरणाचो सोद घेतले अशें तांणी म्हणलें. आतां विरियातोंनी नमूद केल्ले ते मंत्री कोण हे विशीं सगळ्यांचें लक्ष आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
