भांगरभूंय | प्रतिनिधी
मडगांव, प्रतिनिधी ः गोंयचें स्वतंत्र पोस्टल सर्कल तयार करपाची गरज आसा. गोंयांतल्या पोस्ट खात्याच्या रिक्त पदां खातीर गोंयकार उमेदवारांक संद मेळची हे खातीर केंद्रीय पांवड्यार हालचाली करप गरजेचें आसा. राज्य आनी केंद्र सरकारान मेळून हे विशीं निर्णय घेवचो अशें गोवा फॉरवर्ड अध्यक्ष विजय सरदेसाय हांणी सांगलें.
गोवा पोस्ट खात्याच्या सहकारान फातोड्ड्यांच्या ‘गोंयकार घर’ हांगा गोवा फॉरवर्ड पक्षा वतीन आधार कार्ड शिबिर आयोजीत केल्ले. ह्या वेळार आमदार सरदेसाय हांणी अंत्योदयाच्या तत्वा प्रमाण निमाण्या घटका मेरेन सेवा पावोवपाचो यत्न करता. सरकाराच्यो येवजण्यो लोकांमेरेन पावोवपा खातीर आनी अर्थीक साक्षरताय हाडपा खातीर पोस्ट खाते वावुरता अशें सांगलें.
पोस्ट विभाग हें एक व्हडलें खातें. पोस्ट खात्यांत काम करपी जायत्या कर्मचाऱ्यांक, पोस्टमॅनांक कोंकणी भास कळना. राज्या भायले जायते लोक गोंय पोस्टांत काम करतात. पोस्ट आनी गोंयकारांनी एकठांय काम करपाची गरज आसा. ते खातीर पोस्ट खात्यांत काम करपी कर्मचारी गोंयकार आसूंक जाय. गोंयां खातीर पोस्टाचे स्वतंत्र सर्कल करपाक जायना जाल्यार गोंयकारांक रोजगार उपलब्ध करुन दिवपाक डबल इंजिन सरकाराक अपेस आयलां अशें जाहीर जातले अशी टिका सरदेसाय हांणी केल्या.
तर हो मुद्दो फुडलें वेंचणुकेक आसतलो: सरदेसाय
गोंयकारांक पोस्टांत नोकरी मेळपाक जाय. महाराष्ट्रांत जनमत कौलांत विलीनीकरणाक विरोध जालो, गोंयाक स्वतंत्र राज्याचो दर्जो मेळ्ळो आनी कोंकणी भाशेक राजभाशेचो दर्जो मेळ्ळो. अशे आसतना पोस्ट खात्यांत महाराष्ट्र सर्कल कित्याक? असो प्रस्न आमदार सरदेसाय हांणी केलो. गोंयची वेगळी वळख आसून लेगीत महाराष्ट्रा कडेन कनेक्शन दवरप चुकीचें. सरकारान वर्सा भितर स्वतंत्र गोंय सर्कल केलें ना जाल्यार येवपी वेंचणुकेंत होच मुद्दो आसतलो अशें आमदार सरदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
