भांगरभूंय | प्रतिनिधी
नवी दिल्लीच्या विज्ञान भवनांत जाल्ल्या ७० व्या राष्ट्रीय चित्रपट पुरस्कार सुवाळ्यांत अभिनेते मिथुन चक्रवर्तीक दादासाहेब फाळके पुरस्कार फावो जालो. फिल्म इंडस्ट्रींतलो एक अभिमानाचो भोवमान मेळ्ळ्या उपरांत मिथुन हांकां माचयेर आयले आनी तांणी भावनीक भाशण केलें. तांणी सांगलें, कामाक सुरवात केली तेन्ना काळ्या रंगाक लागून थोमणे आयकुचे पडटाले. पूण ताणें आपल्या नाचान नांव जोडपाचें थारायलें आनी ताका देशभरांत ‘डिस्को डान्सर’ म्हणून वळख मेळ्ळी.
मिथुनान ‘मृगया’ ह्या पयल्या चित्रपटा खातीर राश्ट्रीय पुरस्कार फावो जालो. हाचेर तांणी म्हणलें, म्हाका पयलो पुरस्कार मेळ्ळो तेन्ना म्हाका दिसूंक लागलें हांव अल पचिनो (हाॅलिवूड अभिनेतो) आनी हांवें कितें तरी अजापीत करपा सारकी गजाल केल्या. म्हजो अॅटिट्यूड बदल्लो. आमी निर्मात्यांच्या ऑफिसांत जमताले. हांव अल पचिनोचो अभिनय करतां हें निर्मात्याक कळनाशिल्लें. एक दीस हांवें एका निर्मात्याक म्हज्या घरा फिल्माची स्क्रिप्ट धाडपाक सांगलें. हें आयकून निर्मात्यान म्हजेर खोंट मारली आनी म्हणलें, हांगाच्यान भायर सर. त्या दिसा सावन हांव ‘अल पचिनो’चो ‘कल पचिनो’ जालों. म्हाका कळ्ळें की हांवें चूक केल्या, आतां म्हाका कोणूच काम दिवचो ना.
म्हाका कालिया म्हणटाले
मिथुनान मुखार सांगलें, लोकांनी म्हाका एक अभिनेतो म्हणून स्विकारलो. पूण सगळ्यांत व्हडलो प्रॉब्लेम म्हळ्यार म्हजो रंग. हो काळो रंग फिल्म इंडस्ट्रींत काम करचो ना अशें लोक म्हणटाले. हांगा कितें करता, परत वच. रस्त्यार चलतना लोक म्हाका ‘कालिया’ म्हणटाले. हांव कितें करचें हाचो विचार करपाक लागलों. देवा कडेन मागतालो की देवा, तुका म्हजो रंग बदलूंक मेळना? पूण देव म्हजो रंग बदलपाक शकलो ना. आतां कितें करचें असो विचार हांव करपाक लागलो. मागीर म्हाका दिसलें, हांव नाचूंक शकतां. नाचपाक येता जाल्यार पांयांनी अशे तरेन नाचपाक जाय की लोक म्हज्या काती कडेन न्हय, म्हज्या रंगा कडेन न्हय, म्हज्या पांयांक पळयतले. हांवें तशेंच केलें. म्हजे सिनेमा पळयात, सगळ्या सिनेमांत पांयांनी नाचलों. लोक म्हजो रंग विसरले आनी हांव एक सेक्सी, डस्की बंगाली बाबू जालों.
ताटांत सहज कांयच पडूंक ना
हांव देवा कडेन खूब कागाळी करतालों. कारण जिणेंत म्हज्या ताटांत सहज कांयच पडूंक ना. बरेच त्रास घेवन हांवें तें मेळयलें. तेन्ना हांव देवाक म्हणटालों, तुवें म्हाका नांव आनी नामना दिली. मागीर म्हाका इतलो त्रास कित्याक दिता? जायत्यो कागाळी करतालों. एक दीस हांव असोच विचार करतालों, तेन्ना दिसलें होच मार्ग आसपाक शकता. मात तशें जावंक ना. आयज हो पुरस्कार मेळ्ळे उपरांत हांवें देवा कडेन कागाळी करपाचें बंद केलां. हांवें देवाक म्हणलें, दिनवास भोले नाथ, दिनवास गुरु शिव. आतां हांव कागाळी करचों ना. कारण तुवें म्हाका सगळें व्याजा सयत परत दिलां, अशें मिथुनान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
