भांगरभूंय | प्रतिनिधी
पणजी ः सेंट फ्रान्सीस झेवियर हांचे कुडी विशीं आक्षेपार्ह विधान केल्ल्या प्रकरणांत सत्र न्यायालयान अटकपूर्व जामीन न्हयकारले उपरांत हिंदू रक्षा महाआघाडीचे राज्य निमंत्रक सुभाष वेलींगकार हांणी उच्च न्यायालयांत अर्ज दाखल केल्लो. ताचेर आयज सुनावणी जाली. मजगतीं, दिवचल पुलिसांनी धाडिल्ले तिसरे नोटिशींचे पालन करुन वेलींगकार चवकशेक हजर रावपाक तयार आसा, पूण तांका अटक जावची ना हाची हमी पुलिसांनी दिवची असो युक्तिवाद ज्येश्ठ वकील अॅड. सरेश लोटलीकार हांणी वेलींगकार हांचे वतीन केलो.
मजगतीं, उच्च न्यायालयान दिवचल पुलिसांनी धाडिल्ले नोटिशींचें पालन करुन आयज सांजवेळा मेरेन पुलीस स्टेशनाचेर हजर रावपाचो आदेश वेलींगकार हांकां दिला. ह्या प्रकरणांतली फुडली सुनावणी मंगळारा जातली. वेलींगकार हांणी दाखल केल्ल्या अटकपूर्व जामिनाक विरोध करून 4 जाणांनी हस्तक्षेप याचिका दाखल केल्ली.
मजगतीं, वेलींगकार हांणी केल्ल्या वादग्रस्त विधान उपरांत राज्यभरांतले क्रिस्ताव भाव- भयणी रस्त्यार देंवल्यो. वेलींगकार हांका अटक करपाची मागणी करून मडगांवां आंदोलनां केलीं. उपरांत दिवचल पुलिसांनी वेलींगकार हांचे आड गुन्यांव नोंद करून तांकां चवकशी खातीर आपयल्लें. ते खातीर तांकां दोन फावटीं नोटीसय धाडिल्ली. तरी लेगीत वेलींगकार चवकशी खातीर हजर रावूंक नाशिल्ल्यान पुलिसांनी पंगड तयार करून गोंयांत, महाराष्ट्रांत तांचो सोद घेवपाक सुरवात केली. उपरांत आतां दिवचल पुलिसांनी तांका चवकशे खातीर हजर रावपाक तिसरी नोटीस धाडल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
