भांगरभूंय | प्रतिनिधी
पणजीः गोंयचे नामनेचे गायक, संगीतकार, गीतकार तशेंच नाट्य कलाकार पुरुषोत्तम वसंत पै हांकां म्हाराष्ट्राचो नामनेचो ‘संगीत तपस्वी’ पुरस्कार फावो जालो. संगीत, नाटक तशेंच संगिताच्या मळार मोलादीक योगदान दिल्ले खातीर तांकां हो पुरस्कार भेटयलाे.
हो पुरस्कार स्मित बरी प्राॅडक्शन,मुंबय, शिवसेना, मुंबय, तशेंच गोंय कला आनी संस्कृती संचालनालयाचे वतीन मुंबय वाठारांत श्री शिवाजी मंदिरांत घडोवन हाडिल्ल्या कला, नाट्य, एकता संमेलनाचे खाशेले कार्यावळींत मुखेल सोयरे सिने अभिनेते अरुण नलावडे हांचे हस्तुकीं पै हांकां भेटयलो.
पुरस्कार जैतिवंत पुरुषोत्तम वसंत पै हे संगिताच्या मळार दोळे दिपकावपी वावर करपी यशप्रभा हें संस्थेचे संस्थापक आनी अध्यक्ष आसात. फाटलीं तीन दसकां आपलें संस्थे वतीन ते संगीत आनी नाट्य मळार निसुवार्थीपणान सेवा दीत आसात. प्रभा संगीत संध्या ह्या तांच्या भक्ती, भाव आनी नाट्यगीतांचे मैफलींतल्यान संगीत मोगींची मनरिजवण करीत आसात. संगीत नाटकांची निर्मिती करून तांणी गोंयांत तशेंच गोंया भायर नांव जोडलां. नव्या गायकांक आनी नाट्य कलाकारांक तांणी माची मेळोवन दिल्या.
हाचे आदीं दोन वर्सां पयलीं पै हांकां म्हाराष्ट्राचो ‘संगीत रत्न’ पुरस्कार फावो जाल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
