भांगरभूंय | प्रतिनिधी
म्हापशें : कोलवाळचे बंदखणींतलो कैदी राजू दास हांणी स्वताकूच उजो लावन आत्महत्त्या करपाचो यत्न केलो. हातूंत तो ४० टक्के हुलपलो. ताचेर सध्या गोमॅकोंत उपचार सुरू आसात.
हे विशीं चड म्हायत प्रमाण, ही घडणूक बंदखणीच्या दवाखान्यांत घडली. हेर कैटी छळ केल्ल्यान, ताका वाजेवन तांणी हें पावल उबारलें असो अदमास बंदखण प्रशासनान उक्तायलो. ही घडणूक आयज सकाळीं ११ वरांचेर घडली. जखमी कैदी राजू दास हो बंदखणींतल्या दवाखान्यांत हेल्पर म्हणून काम करता. घडणुके वेळार वैजकी अधिकार्यांची नदर चुकोवन दवाखान्याच्या भितरले कुडींत गेलो. कुडीक भितरल्यान खिळी घाली. वांगडा तांणी जखमी साफ करपी स्पिरीट घेतलें. पयलीं तें स्पिरीट तो पियेलो आनी उरिल्लें आंगार ओतलें. उपरांत स्वताक उजो पेटयलो. आंग जळपाक लागिल्ल्यान दास हांणी बोवाळ मारपाक सुरवात केली. उपरांत थंयच्या डॉक्टरांनी हेरांनी कुडी वटेन धांव मारली. मात कुडीक भितरल्यान खिळी आशिल्ली. उपरांत बंदखणिंतल्या कर्मचार्यांनी दार मोडलें. रोखडोच ताका म्हापशेंच्या हॉस्पिटलांत दाखल केलो. थंयच्यान दास हाका जीएमसींत व्हेलो. थंय ताचेर उपचार सुरू आसात.
मजगतीं, आत्महत्त्येचो यत्न केल्ल्यान दासाचें तोंड, छाती आनी पोट हुलपलें. तो सुमार ४० टक्के हुलपलो. हे विशीं कोलवाळ पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
