भांगरभूंय | प्रतिनिधी
पणजी : राज्यांत आयिल्ल्या दिसा जावपी अपघातांक घालून लोकांनी हुस्को उक्तायल्या. हे विशीं उपाय येवजण चालीक लावपाक सरकारी यंत्रणां उणी पडिल्ल्याचें दिसून आयलां.
मजगतीं, काल जाल्ल्या दोन अपघातांनी खुरसा कडे-उसगांवां दुचाकी आनी गाडये मदीं जाल्ल्या अपघातांत गंभीर जखमी जाल्लो प्रशांत घाडी (२५,तिस्क-उसगांव) ह्या दुचाकी चालकाक उपचारा मजगतीं मरण आयलें. जाल्यार खोर्ली-मळार मंगळारा दनपरां टेम्पो, गाडी आनी दोन दुचाकीं मदीं अपघात जालो. हातूंत स जाण जखमी जाल्ले. दोगांची भलायकी हुस्को करपा सारकी आसा. जाल्यार आयज सुकेकुळण -पेडणेंच्या आयुष हॉस्पिटला लागसारा कार वॉशींग सेंटरा मुखार दोन दुचाकीं मदीं जाल्ल्या अपघातात दुचाकी चालक जखमी जावपाची घडणूक घडली.
धा दिसांनी दोगांक मरण
मजगतीं, ४ ऑक्टोबराक सकाळच्या ८:३० वरांचेर रावणफोंडच्या पुला लागसारा चालकाचें वाहना वयल्यान नियंत्रण सुटिल्ल्यान गाडी रस्त्या कुशीक वचून उमथली. चालक जखमी जालो. जाल्यार गाडयेचें लुकसाण जालें. तशेंच पणजेच्या चिंबल जंक्शना कडेन वोल्त घेतना चालकाचें वाहना वेल्यान नियंत्रण सुटिल्ल्यान कदंब बस उमथली. मजगतीं हातूंत आडकल्ल्या प्रवाशांक थळाव्यांचेर मजतीन भायर काडले. मजगतीं देंवतेचेर गाडयेचे ब्रेक फेल जाल्ल्यान हो अपघात घडिल्ल्याचें मुखार आयलें. हातूंत कांय प्रवाशांक दुखापत जाली. तशेंच ३ ऑक्टोबराक प्रियोळा माल व्हरपी पिकअप आनी दुचाकी मदीं अपघात घडलो. दुचाकी फाटल्यान बशिल्ली अनुराधा पाध्ये (६२) हांच्या आंगावेल्यान पिकअप गेल्ल्यान तिका मरण आयलें. जाल्यार दुचाकी चलोवपी योगेश पाध्ये हांकां हॉस्पिटलांत दाखल केले. ३ ऑक्टोबराक सांजेवेळार पत्रादेवी चेकपोस्टा लागसारा एका माल व्हरपी कंटेनराचो अपघात जालो. वाहना वेल्यान ताबो सुटिल्ल्यान हो कंटेनर सरळ रस्त्या कुशीक आशिल्ल्या दुकानांत भितर सरलो. हातूंत कंटेनराच्या कॅबिनाच्या मुखा वेल्या भागाचें लुकसाण जालें, जाल्यार दुकानाचेंय लुकसाण जालें.
णव म्हयन्यांतले अपघात
राज्यांत १ जानेवारी ते १४ सप्टेंबर ह्या काळांत सुमार १,८२४ अपघात जाल्यात. हातूंत १८६ भिरांकूळ. वयल्या काळांत वट्ट १९७ जाणांक मरण आयलां. तशेंच १४३ अपघातांत १८७ जाणांक गंभीर दुखापत जाल्या. राज्यभर जाल्ल्या ३६९ बारीक सारीक अपघातांत ५६६ जाणांक दुखापत जाल्या. १,४९५ अपघातांत वाहनांचें व्हड लुकसाण जाल्ल्याची म्हायती मुखार आयल्या.
२०२१ ते २०२३ मेरेन दुचाकी अपघातांत ५४१ जाणांक आपलो जीव वगडावचो पडला. तांतल्या ३५७ जाणांनी हॅल्मेट घालूंक नाशिल्लें.
मजगतीं, गोंयांत रस्तो अपघातांत मरण येवप्यांचें प्रमाण वाडतूच आसा. वर्साच्या पयल्या स म्हयन्यांत ह्याच कारणाक लागून १६७ लोकांक मरण आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
