भांगरभूंय | प्रतिनिधी
पणजी, प्रतिनिधी ः जायते तरणाटे अपघातात मरण पावतात. हाचे फाटले कारण म्हळ्यार भुरगे वाहना मजा आनी मस्ती खातीर चलयतात. जर वाहन आपली गरज म्हूण चलयलें तर अपघात उणे जातले. तशेंच पर्यटक लेगीत मजा करपाक गोंया येतात तेन्नाय ते वाहन एक मजा म्हूण चलयतात. पर्यटकांनी लेगीत समजुतकायेन हीं वाहनां चलोवपाची गरज आसा अशें येरादारी उपसंचालक संदीप देसाय हांणी सांगलें.
रस्तो सुरक्षा सप्तकाच्या फाटभूयेंर येरादारी खाते आनी शिक्षण संचालनालयान ‘रस्तो सुरक्षेचो नायक जायात’ हे संकल्पने खाला डाॅन बॉस्को सभाघर पणजे हांगा बुधवारा रस्तो सुरक्षा प्रदर्शन घडोवन हाडलें. ह्या वेळार संदीप देसाय उलयताले. ह्या वेळार उपविभागीय शिक्षण अधिकारी स्मिता फळदेसाय, किरण खोलकार आनी डॉन बॉस्को शाळेचे मुख्याद्यापक हजर आशिल्ले.
येरादारी संचालनालय 13 वें रस्तो सुरक्षा सप्तक 14 ते 20 ऑक्टोबर मजगतीं मनयतलें. देश पांवड्यार रस्तो सुरक्षा सप्तक जानेर म्हयन्याच्या दुसऱ्या सप्तकात मनयतात. पुण देश पांवड्या बरोबर राज्य पांवड्यार लेगीत फाटलीं 13 वर्सा रस्तो सुरक्षा सप्तक मनोवपी गोंय हे एकमेव राज्य जावन आसा, अशें देसाय हांणी सांगलें.
गोंय ल्हान राज्य आसून लेगीत अपघातांत मरप्यांचो आंकडो चड आसा. रस्ते, सिग्नल सारकें ना, हवामान इबाडलां अशी कागाळ लोक करतात. पूण चडशे 18 ते 16 वर्सा पिराय मजगतीचे तरणाटे 60 टक्के अपघातांत मरण पावतांत. हीं मरणां कशीं उणीं करप हाचेर आमी अंदूंच्या रस्तो सुरक्षा सप्तकांत भर दितले, अशी म्हायती देसाय हांणी दिली.
हे अपघात कमी करतले जाल्यार वाहनांचो फकत गरजे पुरतोच वापर करात. जेन्ना तुमी गरजे पुरतोच वाहनाचो वापर करतात तेन्ना तुमका रस्त्याचो सामको अदमास येता. फोंणकुला खंय आसात, सिग्नल खंय आसात हें तुमकां कळटा आनी अपघात जावपाची शक्यताय खुब उणी आसता. जर मजा, मस्ती करपाक वाहन चलयता जाल्यार 99 टक्के अपघात जावपाची शक्यताय आसता.
ते भायर गोंयात येवपी जे पर्यटक आसात ते आपल्या राज्यांत शिस्तीन वाहनां चलयतात. पूण जेन्ना ते गोंया पावता तांचे भितर अचकीत बदल घडटा आनी आमी मजा मारपाक आयल्यात अंशे चिंतून हडबडीत गाडयो धोफरायतात. हे मजगती तांचे रस्त्यार लक्ष आसना, मजा मारपा कडेन लक्ष आसता. गोंयांत येवपी पर्यटकांनी आपलें वाहन फक्त गरजे खातीर एक सुवातेवेल्यान दुसरे सुवातेचेर वचपा खातीर वापरचें असो उलो देसाय हांणी मारला.
वाहन हें मजा मारपाची वस्त न्हय तर गरज पुराय करपाची वस्त ही गजाल चालक आत्मसात करून आपले भितर बदल करत जाल्यार अपघातांच्या प्रमाणात उणाव जावपाक शकता, अशे मत देसाय हांणी उक्तायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
