भांगरभूंय | प्रतिनिधी
नवी दिल्ली, खबरां संस्था: दिल्लीक एक धक्को दिवपी घडणूक घडली. पश्चीम दिल्लीच्या विकासपुरी वाठारांत एका सिरीयन शरणार्थी आनी तांच्या बाळकाचेर ॲसीड हल्लो जाल्ल्याची घडणूक मुखार आयल्या. हो हल्लो त्याच वाठारांत रावपी एका गटान केल्ल्याचो आरोप आसा. ह्या प्रकरणांत पुलीस स्टेशनांत गुन्यांव दाखल जाला. धक्को दिवपी गजाल म्हळ्यार हे घडणुकेंत ११ म्हयन्यांच्या बाळकाचेर ॲसीड हल्लो जालो. सध्या ह्या दोगांयचेर हॉस्पिटलांत उपचार सुरू आसात.
ही घडणूक ३० सप्टेंबराक घडिल्ली. गंभीर जखमी जाल्ल्या मनशाचें नांव रफत. तो ताच्या पासपोर्टा प्रमाण सिरीयन जावन आसा. तो तिची बायल आनी ११ म्हयन्यांच्या बाळका सयत संयुक्त राष्ट्रांच्या उच्चायुक्त कार्यालयाच्या लागसारा रस्त्यार रावतालो. मात तांकां थंय रावपाक थळाव्या लोकांनी विरोध केल्लो.
हे घडणुके विशीं रफत हांणी सांगलें, ॲसीड हल्लो जाले उपरांत ताची मान आनी खांदे कांय प्रमाणांत भाजले. फाटल्या दिसांनी आपणें कॉल सेंटरांतली नोकरीय वगडायली. उपरांत तांणी मदती खातीर UNHCR कडेन संपर्क केलो. मात आमी शरणार्थी आसात आनी आमी मदती खातीर फकत यूएनएचसीआर कडेन मदत मागपाक शकता. थंयच्या अधिकार्यांनी आमची मजत करपाक न्हयकारलें. ताका लागून आमचे कडेन रस्त्यार रावपा बगर हेर पर्याय ना. ताका लागून तात्पुरते आमी रस्त्याचेर रावलीं. मात हांगच्या थळाव्यांक आमचें हांगा रावप आडखळटालें आनी ते आमकां वायट वागणूक दिताले. ३० सप्टेंबराक मारिसा लागसारा भौशीक शौचालय वापरतना एका पंगडान येवन आमचेर हल्लो केलो. तेन्ना हांवें पळपाचो यत्न केलो. मात तांणी म्हजेर आनी म्हज्या चल्याचेर कितें तरी उडयलें. ताका लागून म्हजी कांत जळपाक लागली अशें तांणी सांगलें.
मजगतीं, रफत हांणी दावो केलो की, आपल्या जायत्या ऑटोरिक्षा चालकांक स्वताक आनी आपल्या पुताक हॉस्पिटलांत व्हरपा खातीर उलो मारलो. मात कोणेंच मजत करूंक ना. उपरांत एका दुचाकी चालकान मजत केली आनी हॉस्पिटलांत हाडून सोडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
