भांगरभूंय | प्रतिनिधी
का ल मंगळार 8 ऑक्टोबर भारतीय हवाई दळ दीस. 8 ऑक्टोबर 1932 दिसा भारतीय हवाई दळाची स्थापणूक ब्रिटिशांचे कारकिर्दींत जाली. काल भारतीय हवाई दळान आपलो 91 वो वाडदीस मनयलो. भारतीय हवाई दळ संवसारांत चौथ्या क्रमांकाचेर आसा. ह्या हवाई दळाचे वट्ट पांच विभाग आसात. अस्तंत, पूर्व, दक्षीण, उत्तर आनी मध्य. भारतीय हवाई दळांत वट्ट 1,70,000 जवान कार्यरत आसात. भारतीय हवाई दळाचें ध्येयवाक्य सकयल दिल्ले प्रमाण आसा.
नभ:स्पृशं दीप्तम्।
हें वाक्य गीतेंतल्या एका श्लोकांत आयलां. श्लोक असो-
नभ:स्पृशं दीप्तमनेकवर्णं
व्यात्ताननं दीप्तविशालनेत्रम् ।
दृष्ट्वा ही त्वां प्रव्यथितान्तरात्मा
धृतिं न विन्दामि शमंच विष्णो॥
….भगवद्गीता 11.24
हे ब्रीद वाक्य
भारताचे आदले राष्ट्रपती डॉ. राधाकृष्णन हांणी सुचयिल्लें. भारताचे पयले हवाई दळ मुखेली सुब्रोतो मुखर्जी आशिल्ले. 1947 वर्सा विमानांक पिस्टनाचेर चलपी इंजिनां आशिल्लीं. जेट विमान आयले उपरांत ती सुवात गतीन वचपी जेट विमानान घेतली. रडार क्षेपणास्त्रां दळणवळण यंत्रणा, नॅटवर्क, सेंट्रीक वारफेर सी-4 आय संगणक, हवेंतले हवेंत इंधन पुरवण करपी विमानां, पयसुल्ल्या अंतरा वेलीं यंत्रणा हाका लागून हवाई दळ बळिश्ट जालां.
भारताच्या स्वातंत्र्या उपरांत हवाई दळाक वट्ट चार फावटी पाकिस्ताना कडेन आनी एकदां चीना कडेन झूज करचें पडलें. ह्या दोनूय झुजांत भारतीय हवाई दळान दोळे दिपकावपी कामगिरी केली. दुसऱ्या म्हाझुजांतूय भारतीय हवाई दळान जपानी सेनेका बर्मा शिमेर आडायिल्ले.
भारतीय हवाई दळाची शक्त लेगीत खूब मोटी आसा. वट्ट 1700 विमानां तांच्या सांठ्यांत आसात. आतां ‘प्रचंड’ हें विमान लेगीत तांचे मजतीक आसा. सद्या भारतीय हवाई दळाचे मुखेली अमर प्रीत सिंग हे आसात. भारतीय हवाई दळ हें शिमेचें हवाई रक्षण तर करताच. पूण खूबशा सैमीक आपत्ती वेळार लेगीत मजत केल्या. तातूंत गुजरातांतलें 1998 चें वादळ, सुनामीच्या काळांत 2004 वर्सा केल्ली मजत, ईशान्य भारतांत आयिल्लो हुंवार त्या वेळार केल्ली मजत हांचो आस्पाव आसा.
1 एप्रील 1933 ह्या दिसा पयलो पंगड जातूंत 6 आयएफ प्रशिक्षीत अधिकारी आनी 19 कर्मचारी आशिल्ले. दर वर्सा 8 ऑक्टोबर ह्या दिसा भारतांतल्या हिंडन अॅर फोर्स स्टेशन गाझियाबाद उत्तर प्रदेश हांगा हवाई दळ दीस मनयतात.
ह्या दिसा मळबांत विमानां उड्डाणां करून दोळे दिपकावपी कसरती करतात. अशा ह्या हवाई दळाक शौर्याची परंपरा आसा. ह्या वर्सा हवाई दळाच्या वाडदिसा निमतान प्रत्यक्षिकां हीं उत्तर प्रदेशांतल्या प्रयाग राज हांगा जालीं. ह्या वर्साचें ब्रीदवाक्य आसा ” IAF .. Airforce Beyond Boundries ” काल हवाई दळान व्हड अभिमानान 91
वर्सांचो कालावधी पुराय केलो. भारतीय हवाई दळ भारतीय हवाई वाठाराचें रक्षण करता आनी ताचे कडेन हवाई झुजाची जापसालदारकी आसा. संवसारांतल्या पांच हवाई दळांत भारतीय हवाई दळाची गणना जाता.
शांताराम वाघ
96234 52553
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
