भांगरभूंय | प्रतिनिधी
पणजी: खोर्ली-मळार (तिसवाडी) राष्ट्रीय म्हामार्गार मंगळारा दनपारां टेम्पो, मोटार आनी दोन दुचाकीं मदीं अपघात जालो. अपघातांत शितपेयाचें वितरण करपी टेम्पो रस्त्यार लंवडलो. ह्या अपघातांत स जाण जखमी जाले. तातूंत सुब्रता कुमार (खोर्ली) आनी मोहिमा जाधव (माशेल) ह्या दोगांचेर बांबोळे गोंय वैजकी म्हाविद्यालयाच्या हॉस्पिटलांत उपचार सुरू आसात.
ह्या वेळार व्हड प्रमाणांत येरादारीची कोंयडी जाली. मजगतीं, ह्या प्रकरणांत पोरणें गोंय पुलिसांनी वाहन अपघाताचो गुन्यांव दाखल करून तपास सुरू केला.
पुलिसांनी दिल्ले म्हायती प्रमाण काल दनपारां एक वरांचेर खोर्ली मळार रेल्वे ओव्हरब्रिजा कुशीक टेम्पो, मोटार आनी दुचाकीं मदीं अपघात जालो. टेम्पो पोरणें गोंय सावन खोर्ली वतालो. जाल्यार मोटार विरुद्ध दिशेन येताली. वयले सुवातेर पावले उपरांत दोनूय वाहनांचो एकामेका सामकार धपको बसलो. धपको इतलो जबरदस्त आशिल्लो की टेम्पो रस्त्यार लंवडलो. उपरांत दोनूय वाहनांनी दोन दुचाकींक आनी मोटारीक धपको दिलो. तातूंत सुब्रता कुमार (खोर्ली) आनी मोहिमा जाधव (माशेल) हे दोगूय दुचाकी चालक आनी मोटारींतले मुंबयचे देवेंद्र क्षीरसागर, नलिनी क्षीरसागर, प्रनाद क्षीरसागर आनी जानवी क्षीरसागर किरकोळ जखमी जाले. ह्या सगल्यांक गोमॅकाँत दाखल केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
