भांगरभूंय | प्रतिनिधी
तीन वीज खांबे मोडिल्ल्यान 20 वरां वीज गायब
म्हापशें: सोमारा सांजवेळा पडिल्ल्या वादळी पावसाचो तडाखो बार्देस म्हालाक बसलो. उसकय पावसाचो फटको व्हड प्रमाणांत बसलो. पांच कडेन झाडां पडलीं 20 वरां उपरांतूय वीज पुरवण सुरू जावंक नाशिल्ली.
सेंट अँथनीवाड्यार जोगूल पडलें. हाका लागून चिंचेचें झाड हुमटून वीज खांब्यां सयत सुभाष पोकळे हांच्या घराचेर पडलें. हातूंत उच्च दाबाच्या वाहिन्यांचे तीन खांबे पडून वाहिन्यो तुटल्यो. तशेंच पोकळे हांच्या घराचें लुकसाण जालें. सुदैवान पडिल्ल्या जोगलाचो स्पर्श कोणाक जालो ना.
उच्च दाबीत वीज वाहिन्यां सयत खांबे मोडिल्ल्यान पुराय उसकय पालयें पुनोळें आनी बस्तोडें पंचायत वाठारांतली वीज पुरवण खंडीत जाली. रातीं उसरां वीज कर्मचाऱ्यांनी बस्तोडेंची वीज पुरवण सुरळीत केली. पूण उसकयतलें मोडून पडिल्ले विजेचे खांब आनी वीज वाहिन्यो जोडपाचें काम मंगळारा सकाळीं हातांत घेतलें.
जागबाई देवळा कुशीक तुटिल्ल्यो वाहिन्यो दनपार मेरेन दुरुस्त केल्यो. तशेंच मोडून पडिल्ल्या खांब्याचे सुवातेर नवे खांबे उबारपाचे काम वीज खात्यान कंत्राटदारा वतीन हातांत घेतलें.
पुनोळ्यां सोऱ्याचे कंपनी कुशीक आनी चर्ची कुशीक तुटिल्ल्यो वीज वाहिन्यो जोडपाचें काम सांजवेळा सुरू केलें. कांय वाठार सोडून चडश्या उसकय पंचायत वाठारांतली वीज पुरवण मंगळारा सांजवेळा 4 वरां मेरेन सुरू जावंक नाशिल्ली.
रातीं 8 मेरेन ही वीज पुरवण सुरळीत जावपाची शक्यताय वीज अधिकाऱ्यांनी उक्तायल्या. ताका लागून उसकयंतल्या लोकांक 24 वरां विजे बगर काडचे पडले.
सोमारा 7 वेर सांजवेळा लागिल्ल्या वादळी पावसाक लागून बार्देस म्हालांत वट्ट 30 झाडां पडिल्ल्याच्यो घडणुको घडल्यो. हातूंतलीं चडशीं झाडां ही हळदोणें मतदारसंघांत पडलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
