भांगरभूंय | प्रतिनिधी
वाळपय, प्रतिनिधी : खोतोडा- हरिजनवाडो हांगाच्या प्रल्हाद सदानंद परवार हांच्या घराचेर झाड पडून घर पुराय कोसळ्ळें. हें कुटूंब सध्या बेघर जालां. सरकारान हाची दखल घेवची अशे तरेची मागणी थळाव्यांनी आनी कुटुंबियांनी केल्या. सरपंच रोहिदास गांवकार, थळावे पंच वांगडी राजाराम परवार, भलायकी मंत्री विश्वजीत राणे हांणी हाची दखल घेवची, अशी मागणी लोकांनी केल्या.
सोमारां सांजेवेळार वादळाचो फटको बसलो. ह्या वेळार झाडां पडलीं. खोतोडेंच्या सीता गांवकार हांच्या घराचेरूय झाड पडून लुकसाण जालें. ह्या कुटुंबाचें सुमार देड लाख रुपयांचें लुकसाण जालां. प्रल्हाद सदानंद परवार हांच्या घराचेर रानवटी झाड पडून घर पुरायेन उध्वस्त जालें. वारें सुरू जालें तेन्ना भंयानूच हें कुटूंब घरा भायर आयिल्ल्यान वाटावलें. घराच्या पांख्यार झाड पडिल्ल्यान पांखें मोडलां. पांख्याचो भाग घरांतल्या वस्तुंचेर पडिल्ल्यान सामानाचें लुकसाण जालां.
वाळपय उजो पालोवपी जवानांनी घराचेर आशिल्लें झाड काडलें. दळाचे अधिकारी संतोष गांवस हांच्या म्हणण्या प्रमाण, ह्या कुटुंबाक व्हडा प्रमाणात फटको बसला. घराच्या वण्टीय पडल्यात. मजगतीं सरपंच रोहिदास गांवकार आनी पंच वांगडी राजाराम परवार हांणी घडणुके सुवातेर भेट दिवन पळोवणी केली.
वाळपय मामलेदार आनी उपजिल्होधिकार्यांनी हांगा भेट दिवन परिस्थितीची पळोवणी करची आनी हे विशींचो अहवाल बेगोबेग वरिश्ठ अधिकार्यांक सादर करून ह्या कुटुंबाक अर्थीक मजत मेळची म्हणून यत्न करचे, अशी मागणी सरपंच रोहिदास गांवकार हांणी केली.
पंचायती वतीन जे कितें शक्य जातलें तें करतले, अशें तांणी सांगलें. घडणुकेची म्हायती थळावे आमदार विश्वजीत राणे हांकां दिल्या. ते हातूंत निश्चीतूच लक्ष घालतले, हाची खात्री आसा अशें य तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
