भांगरभूंय | प्रतिनिधी
पणजी : सरकारान क श्रेणी कर्मचार्यां खातीर लागू केल्ल्या स्वेच्छा निवृत्ती येवजणे खातीर अनुदानीत शिक्षण संस्थांतल्या कर्मचार्यांक ३ म्हयन्यांची मुजतवाड दिल्या. हाका लागून अनुदानीत शिक्षण संस्थांतल्या कर्मचार्यांक अर्ज करपा खातीर १४ डिसेंबर २०२४ मेरेन मुजत मेळटली.
हे विशींचो आदेश शिक्षण संचालक शैलेश झिंगडे हांणी जाहीर केला. ही येवजण अनुदानीत शिक्षण संस्थांतल्या कर्मचार्यांक लागू करपा विशीचें परिपत्रक सरकारान ३० जुलयाक लागू केले. येवजणे खातीर अर्ज करपाची मुजत १४ सप्टेंबर दिसा सोंपिल्ली. अनुदानीत शिक्षण संस्थेंतल्या कर्मचार्यांक अर्ज करपाक फावोसो वेळ मेळूंक नाशिल्ल्यान शिक्षण खात्यान सरकारा कडेन मुजतवाड दिवपाची मागणी केली. अर्थीक फाट्यान ३ म्हयन्यांची मुजतवाड दिल्या. हाका लागून स्वेच्छा निवृत्ती येवजणे खातीर १४ डिसेंबर मेरेन अर्ज करपाची मेकळीक आसा.
मुख्याध्यापक वा शिक्षण संस्थांच्या मुखेल्यांनी १४ डिसेंबर मेरेन कर्मचार्यां कडल्यान स्वेच्छा निवृत्तीचे अर्ज घेवचे. हे अर्ज दोन वांगड्यांच्या समिती मुखार सादर करप गरजेचें आसा. वेवस्थापन समितीचे अध्यक्ष आनी शिक्षण खात्याच्या संबंधीत विभागाचे उपसंचालक वा तांचो प्रतिनिधी हांची समिती स्थापन करची पडटली. दोन वांगड्यांचे हे समितीन मान्यताय दिल्या उपरांत अर्ज शिक्षण खात्या कडेन सादर करचे, अशें आदेशांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
