भांगरभूंय | प्रतिनिधी
खासदार विरियातो हांची मागणी, विद्यार्थ्यांनी तांकां भेटयिल्लें निवेदन
मुरगांव, प्रतिनिधी: मुंबय उच्च न्यायालयाच्या गोंय खंडपीठान राज्य शासनाक दिल्ले आदेश बेगोबेग पाळचे, हे खातीर केंद्र सरकारान म्हादय अभयारण्याचो व्याघ्र वाठार म्हणून जाहीर करपाची मागणी खासदार कॅप्टन विरियातो फर्नांडीस हांणी केंद्रीय पर्यावरण आनी वनमंत्री भूपेंद्र यादव हांचे कडेन केली.
म्हादय अभयारण्याचो अभ्यास केले उपरांत तिसवाडी पिलारच्या सुमार ६०० विद्यार्थ्यांनी सय केल्लें निवेदन खासदार कॅप्टन फर्नांडीस हांकां सादर केल्लें. हो म्हादय अभयारण्य वाठार व्याघ्र वाठार म्हणून जाहीर करपा विशीं निवेदनांत म्हणिल्लें. ह्या निवेदनाच्यो प्रती जोडून केंद्रीय पर्यावरण मंत्र्यांक धाडिल्ल्या पत्रांत खासदार कॅ. फर्नांडीस हांणी म्हणलां, म्हादय अभयारण्यांतल्या पट्टेरी वाघांचो आंकडो तशेंच पर्यावरण संरक्षणाचे नदरेन तांची रानांतली गरज आनी हेर पर्यावरणाचे नदरेन म्हत्व पटोवन दिवन व्याघ्र वाठार जाहीर करपाची सारकी गरज आसा. पट्टेरी वाघांचो संचार तशेंच तांचें अस्तित्व तिगून उरल्यार हेर रानांतले जीव आनी सैमीक वातावरण हांचीं संतुळा राखप सोंपें जातलें.
हें प्रकरण मुंबय उच्च न्यायालयाच्या गोंय खंडपीठां मुखार दोन म्हयन्यां पयलीं सुनावणेक आयलें तेन्ना म्हादय अभयारण्य वाठार हो व्याघ्र वाठार म्हणून जाहीर करपाचो आदेश न्यायालयान राज्य शासनाक दिल्लो. मात सरकारान तांची गंभीर दखल घेनासतना आजूनय ते विशींचो आदेश जारी करूंक ना. केंद्रीय वन मंत्रालयान हे विशीं लक्ष घालून हो वाठार व्याघ्र क्षेत्र म्हणून बेगीनूच जाहीर करपाची मागणी खासदार कॅप्टन विरियातो फर्नांडीस हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
