भांगरभूंय | प्रतिनिधी
पणजी ः धर्मशास्त्र आनी तत्वगिन्यानाचे तज्ञ आशिल्ले तशेंच कोंकणी चळवळीत आयोजक, संघटक आनी विचारवंत म्हूण मोलादीक योगदान दिल्ले रेव्हरंड फा. मोउजीञु द आतायद हांची अखिल भारतीय कोंकणी परिशदेच्या अध्यक्ष पदाचेर एकमतान निवड जाल्या. हालींच मडगांवच्या कोंकणी भवनांत परिशदेची परिषदेची बसका जाल्ली. हे बसकेंत केरळ, कर्नाटक आनी गोंयचे प्रतिनिधी हाजीर आशिल्ले.
1950 वर्सा साल्वादोर द मुंद हांगा जल्मल्ले फा. मोउजीञु द आतायद फाटलीं दोन वर्सां हें पद सांबाळपी कर्नाटकाच्या अरुण उभयकार हांचे कडल्यान कोंकणी भाशा मंडळा वतीन मडगांवच्या रवींद्र भवनांत जावपी परिशदेच्या 33व्या अधिवेशनांत हें पद स्विकारतले.
फा. आतायद हांची 1975 वर्सा धर्मोपदेशक म्हणून नेमणूक जाली. आतां मेरेन तांणी गोंयच्या आर्च डायसोजनात वेगवेगळीं पदां सांबाळ्ळ्यांत. रोम शारांतल्या उर्बेनियन विद्यापिठांतल्यान तांणी धर्मनियमन कायद्यातली पदवी मेळयल्या. धर्मनियमन कायद्याचे प्राध्यापक म्हूण तांणी राशोल सेमिनारींत पंदरा वर्सां अध्ययनाचे काम केलां. 1990 ते 2019 मेरेन डायोसेसन न्यायाधीश म्हूण योगदान दिलें. सद्या तें साळगांव- पिळर्णच्या सेमिनारींत पदव्युत्तर विद्यार्थ्यां खातीर लॅटीन भाशेचो प्राध्यापक म्हणून काम करता. तांणी राशोल सेमिनारीचेर इतिहासीक प्रबंध बरयला. कोंकणी चळवळींत ते एक निश्ठावान कार्यकर्ते म्हूण सगले तांकां वळखतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
