देवी कात्यायनी

भांगरभूंय | प्रतिनिधी

नवरात्रां : सवी माळ

महर्षी कात नांवाचे एक रुशी आसले. तांकां कात्या नांवाचो पूत आसलो. हांच्या कुळांत नामनेचे कात्यायन हांचो जन्म जालो. कात्यायन भगवती पारंबाची सदां मना पसून पुजा करतालो. खूब वर्सा पुजा तप केले उपरांत देवी तांचेर प्रसन्न जाली. रुशी कात्यायान आपली इत्सा देवीक सांगली. देवीन ताच्या घरांत तांची धूव म्हूण जल्म घेवंचो अशें ताका दिसतालें. ताची इत्सा देवीन मान्य केली. माता भगवतीन रुशी कात्यायान हांची धूव म्हूण जल्म घेतलो.

हेच देवीची आनीक एक काणी आसा. पृथ्वीचेर महिषासुर राकेसाचो आकांत वाडलेलो आनी तो कोणच्यान आटापा येनासलो. ब्रह्मदेव, विष्णू आणि महेश हांणी आपले शक्तीचो एक- एक वांटो घेवन महिषासुर राकेसाचो नास करपाक हे देवीची निर्मिती केली. तिची पुजा करपाचो पयलो मान रुशी कात्यायन हांकां मेळ्ळो म्हूण तिचें नांव देवी कात्यायनी पडलें.  

आपल्या भक्तांची इत्सा पुर्ती करपाचे बाबतींत कात्यायनी मातेची तुळा कोणा कडेनूच करपाक शकनात, इतकी कात्यायनी देवी दानी म्हूण समजतात. देवी विशीं आनीक एक संदर्भ मेळटा. श्रीकृष्णांक घरकार म्हूण प्राप्त करपाक वृंदावनांतल्या गोपींनी यमुनेच्या तिरार देवीची पुजा केल्ली. ब्रजमंडळ कात्यायनी देवीक तांची मुखेल देवी म्हूण पुजतात. 

चार हातांची देवी कात्यायनी मातेचे रूप खुपूच तेजस्वी दिसता. तिच्या उजवे वटेंतलो एक हात भक्तांक भय पयस करून, सुरक्षेचे आश्वासन दिता आनी दर एकल्यान परोपकारी रावचें असो संदेश दिता. हे मुद्रेक शास्त्र अभय मुद्रा म्हणटात. उजवे वटेंतलो दुसरो हात सदां दिवपाक तत्परता दाखोवपी मुद्रेन आसा. शास्त्रांत हे मुद्रेक वरमुद्रा अशें म्हणटात. दावे वटेंतल्या एका हातांत तरसाद आनी दुसऱ्यांत कमळ धरलां.  देवी शिंवाचेर आरूढ जाल्या. 

कात्यायनी देवीची भक्ती केल्यार भक्ताक धन, धर्म, वासना आनी मोक्ष हीं फळां सोंपेंपणी मेळटात. 

– प्रिता परब