भांगरभूंय | प्रतिनिधी
18 सुवातांनी झाडांची पडझड
म्हापशें: सोमारा सांजवेळा लागिल्ल्या परतीच्या वादळी पावसाचो तडाखो बार्देस म्हालाक बसलो. वट्ट18 झाडां पडपाच्यो घडणुको घडल्यो. हातूंत लाखांनी रुपयांचें वीज खात्या सयत लोकांच्या मालमत्तेचें लुकसाण जालें.
सांजवेळा 7 वरांच्या सुमाराक वादळी वाऱ्या सयत उटंगाराचो पावस पडलो. हाका लागून म्हालांतली लोकजीण विस्कळीत जाली. अदमाशेक देड वर अचकीत पडिल्ल्या ह्या पावसाक लागून लोकांची धांदळ जाली. पडझड जाल्ल्या खूबशा वाठारांतली वीज पुरवण रातीं उसरां मेरेन खंडीत आशिल्ली.
वादळी पावसाक लागून म्हालांत खूबशे कडेन झाडां पडलीं. म्हापशें, पर्वरी आनी पिळर्ण उजो पालोवपी दळा कडेन वट्ट पडझडीचे 18 कॉल्स नोंद जाले. हातूंत म्हापशें स्टेशनार 15 कॉल्स नोंद जाल्ले.
नायकावाडो- हळदोणें, पुनोळा- उसकय, खोर्जुंवें, वान्सिओवाडो- गिरी, ग्रीन पार्क जंक्शन गिरी, खोप्रेभाट- नास्नोळें, जागबाई देवळा कुशीक- उसकय, पेलोवाडो उसकय, हळदोणें, खोर्जुंवें पुला कुशीक, पावलू गॅरेजी कुशीक आल्तिनो म्हापशें, मयडें चर्ची कुशीक, पर्वरे शिक्षणीक भवन, पैठण आनी शांतादुर्गा देवळा कुशीक सांगोल्डें ह्या सुवातांनी रस्त्यार तशेंच वीज वाहिन्यांचेर झाडां पडलीं.
तशेंच वेर्ला हांगा आनंद वायंगणकार हांच्या घराचेर माड, खोर्जुंव्यां हळदणकार हांच्या घराचेर झाड पडलें. तशेंच पर्रा आल्वामार कुशीक माड पडिल्ल्यान दोन चारचाकी आनी एका दुचाकीचें लुकसाण जालें. उजो पालोवपी दळाचे जवान ही झाडां मारपाच्या कामांत गुथल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
