भांगरभूंय | प्रतिनिधी
पणजी: भारतीय पुलीस सेवेचे (आयपीएस) अॅग्मू केडराच्या 2019 बॅचीचे अर्शी आदील आनी 2020 बॅचीचे टिकम सिंग वर्मा हे अधिकारी तशेंच तांचे सयत गोंय पुलीस सेवेचे (जीपीएस) अधिक्षक गुरुदास गावडे, नेल्सन आल्बुकर्क, धर्मेश आंगले, प्रबोध शिरवयकार, हरिश्चंद्र मडकयकार आनी संतोष देसाय हांची बदली केल्या. हे विशींचे दोन वेगळेवेगळे आदेश कार्मीक खात्याचे अव्वल सचीव रघुराज फळदेसाय हांणी जारी केल्यात.
जारी केल्ल्या आदेशा प्रमाण हालींच बडटी जाल्ले आयपीएस अधिकारी अर्शी आदील हांची अर्थीक गुन्यांव विभागाचे (ईओसी) अधिक्षकपदार आनी टिकम सिंग हांचे कडेन घुंवळे वखदां विरोधी पंगडाच्या (एएनसी) अधिक्षकपदार बदली केल्या.
तशेंच गोंय पुलीस सेवेचे (जीपीएस) अधिक्षक गुरुदास गावडे हांची कायदो आनी दक्षता विभागाच्या अधिक्षकपदार, नेल्सन आल्बुकर्क हांची आयआरबी कमाडंन्टपदार बदली केल्या. तांचे कडेन पुलीस मुख्यालयाच्या अधिक्षकपदार अतिरिक्त ताबो दिला.
पुलीस अधिकारी धर्मेश आंगले हांची पुलीस प्रशिक्षण केंद्राचे प्राचार्यपदार बदली केल्या. जाल्यार हालींच अधिक्षकपदार बडटी जाल्ले पुलीस अधिकारी प्रबोध शिरवयकार हांची येरादारी अधिक्षकपदार, हरिश्चंद्र मडकयकार हांची कोंकण रेल्वे अधिक्षकपदार जाल्यार संतोष देसाय हांची दक्षता खात्याचे भ्रश्टाचार विरोधी पंगडाचे (एसीबी) अधिक्षकपदार बदली केल्या. तांचे कडेन विशेश विभागाच्या अधिक्षकपदाचो अतिरिक्त ताबो दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
