भांगरभूंय | प्रतिनिधी
पणजी : सुभाष वेलिंगकार हांणी ‘गोंयच्या सायबा’ विशीं केल्ल्या वादग्रस्त विधानाचे फाटभूंयेर गोंयचे क्रिस्तांव भाव तिडकल्यात. शेनवारा दक्षीण गोंयांत वातावरण बरेंच तापिल्लें, मात आयतारा दनपार मेरेन हांगचे आंदोलक फाटीं सरले. वेलिंगकरांक अटक करपाची मागणी आजूनय आसा. मजगतीं चर्चीन लेगीत समाजांत एकवट तिगून उरचो म्हणून शांतिकाय राखपाचें निवेदन केलें. हेच फाटभूंयेर आयज सोमारा कसलेच तरेचो बोवाळ पळोवपाक मेळूंक ना.
मजगतीं विरोधी पक्ष फुडारी युरी आलेमांव हांणी हे विशीं भाशण दिलें. गोंयकारांनी भाजप- आरएसएसचो जातीय तणाव निर्माण करपी ब्ल्यूप्रिंट भायर मारलो अशें तांणी सांगलें. ही परिस्थिती योग्य तरेन सांबाळिल्ले खातीर तांणी गोंयकारांचे उपकारूय मानले. व्हडा प्रमाणांत जमिनीचे वेव्हार, जमीन रूपांतरण, म्हादय आनी जनतेक काळखांत दवरून लक्ष काडून घेवपाचो भाजप यत्न करता हें जनतेक कळ्ळां, अशें आलेमांव हांणी म्हणलें.
वेलिंगकरांच्या वक्तव्यान सगळे दुखवल्यांत. सेंट फ्रान्सिस झेवियराचे कुडीच्या प्रदर्शनाचो सुवाळो लागीं पावलो काय वेलिंगकार अशें कितेंय तरी करतात. पुलिसांनी वेलिंगकार हांकां अटक करची, अशें युरी हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
