भांगरभूंय | प्रतिनिधी
जनजागृती सभेंत कायदेशीर लढो दिवपाचो निश्चेव
भांगरभूंय । प्रतिनिधी
म्हापशें: थियेच्या दोंगर माथ्यार कोमुनिदादीचे मालकेचे 2 लाख चौखण मिटर जमनीर नियोजीत राज्य खाजगी विद्यापीठ स्थापन करपाच्या सरकार आनी कोमुनिदादीच्या निर्णयाक थियेच्या लोकांनी खर हरकत घेतल्या. ह्या विद्यापिठाक लागून गांवांतली सैमीक संपदा नश्ट जातली असो दावो करून ह्या विद्यापिठा आड कायदेशीर लढो दिवपाचो निश्चेव थियेंकारांनी केलो.
आयतारा 6 ऑक्टोबराक सांजेच्या आदेसाक पंचायत सभाघरांत ह्या प्रकल्पा आड थळाव्या लोकांनी जागृताय सभा घेतली. वर्ल्ड पीस युनिव्हर्सिटी हे संस्थेच्या ह्या खाजगी विद्यापिठाक सरकाराच्या गुंतवणूक उर्बा मंडळान तत्वता मान्यताय दिल्या. तशेंच हे जमनीचो म्युटेशना वरवीं मालकी हक्क संबंदीत संस्थेच्या नांवार हस्तांतरीत केला. ह्या एकंदरीत प्रकाराक हे बसकेंत खर हरकत घेतली.
हे बसकेक आदले आमदार किरण कांदोळकार, आदले सरपंच प्रेमानंद म्हावळींगकार, पर्यावरण मोगी स्वप्नेश शेर्लेकार, रॉबर्ट कुलासो, गॉडफ्री डिमेलो हांणी थळाव्या लोकांक मार्गदर्शन केलें. ह्या वेळार व्हड संख्येन थळावे लोक हाजीर राविल्ले.
किरण कांदोळकार हांणी सांगलें, सरकार लोकांक काळखांत दवरून हो प्रकल्प हाडपाक सोदता. गोंय गुंतवणूक उर्बा आनी सुविधा मंडळा खाला सरकार हो प्रकल्प थियेकारांच्या माथ्यार थापपाक सोदता. ह्या प्रकल्पाक हरकत घेवपाचे अधिकार थळावे पंचायती कडेन नात. तातूंत कोमुनिदादीक 5 कोटीं रुपया मेळ्ळ्यात. प्रत्यक्षांत 200 कोटींची जमीन कोमुनिदादीन हे खाजगी संस्थेक दिल्या. ह्या प्रकारांत म्हाघोटाळो जाला. सरकार आनी थळावे आमदार लोकांची दिशाभूल करता, असो आरोप कांदोळकार हांणी केलो.
प्रेमानंद म्हावळींगकार हांणी सांगलें, आमकां गांवांतले दोंगर आनी सैम हे फुडले पिळगे खातीर सांबाळून दवरपाक जाय. अशे तरेन खाजगी विद्यापिठाच्या नांवान दोंगर उध्वस्त करपाक दिवचे नात. जे सुवातेर विद्यापीठ येवपाचें आसा, थंय धनगर समाजाचे लोक रावतात. तांच्या पोटापाण्याचे वेवस्थेचेर हावळ येतली. वीज, ऊदक तशेंच विद्यापिठाच्या घाणयाऱ्या उदकाचो प्रस्न निर्माण जावन गांव नश्ट जातलो, अशी भिरांत तांणी उक्तायली.
स्वप्नेश शिर्लेकार हांणी सांगलें, सरकारान शिक्षणीक संस्थांच्या आदारान शिक्षणाचो वेव्हार चलयला. हेच खातीर गोंयांतल्या शिक्षणीक दर्जाची गुणवत्ता देंवल्या. दोंगराचेर खाजगी विद्यापीठ प्रकल्प हाडून सरकार गांवची हिरवळ नश्ट करपाक सोदता. काँक्रिटाचीं रानां उबारल्यार जनावरां खंय वतलीं? रोजगाराच्या नांवान हो प्रकल्प सरकार हाडपाक सोदता जाल्यार अस्नोडेंच्या तारांकीत हॉटेल प्रकल्पांत कितल्या जाणांक रोजगार दिला हाचें स्पश्टीकरण दिवचें, अशी मागणी तांणी केली.
विद्यापीठ थिये येवपाकूच दिवचे नातः कुलासो
आमी हें खाजगी विद्यापीठ थिये येवपाकूच दिवचे नात. गोंय विद्यापिठाचो दर्जो देंवता, हाचेर सरकारान लक्ष दिवचें. हें प्रकरण तशेंच कोमुनिदाद वेवस्थापकीय समिती आड आमी न्यायालयांत वतले. आमचे वतीन अॅड. कार्लोस फेरेरा बाजू मांडटले. तशेंच आमकां आदले उपमुख्यमंत्री दयानंद नार्वेंकार आनी आदले आमदार किरण कांदोळकार हांचो पुराय तेंको आसा, अशें रॉबर्ट कुलासो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
