भांगरभूंय | प्रतिनिधी
पोरणें गोंयां सभाः वेलिंगकार हांकां तडीपार करपाची आंदोलकांची मागणी
भांगरभूंय | प्रतिनिधी
पणजीः सेंट फ्रान्सीस झेवियर हांचे विशीं सुभाष वेलिंगकार हांणी जें विधान केलां ताचेर भारतीय जनता पक्षाच्या क्रिस्तांव मंत्री आनी आमदारांनी बेगीन आपली भुमिका स्पश्ट करची. जाहीरपणान भुमिका स्पश्ट करप शक्य ना जाल्यार तांणी पदाचो राजिनामो दिवचो, अशी मागणी पोरणें गोंयां जाल्ले जाहीर सभेंत उलोवप्यांनी केली. वेलिंगकार हांचे अटकेची मागणी पुराय गोंयांत जायत आसतना भाजपांतले क्रिस्तांव मंत्री आनी आमदार ओगी कित्याक आसात, असो प्रस्न जायत्या जाणांनी जाहीर सभेंत केलो.
सेंट झेवियर हांच्या अवशेशाची डीएनए चांचणी जावची, ह्या वेलिंगकार हांच्या विधानाचेर पुराय गोंय तापलां. धर्मीक फूट पडपाचो वेळ आयला. आयतारा लेगीत सगळे कडेन तांचे अटकेची मागणी जाली. पोरणें गोंय, दिवाडी, माशेल वाठारांतल्या लोकांनी एकठांय येवन पोरणे गोंय पुलिशेंत वेलिंगकार हांकां तडीपार करपाची मागणी करपी निवेदन सादर केलें. उपरांत लोकांनी निशेध मोर्चो काडलो.
पोरणें गोंय गांधी सर्कला कुशीक जाहीर सभा जाली. प्रसाद हरमलकार, आपचे गोंय फांट्याचे मुखेली अॅड. अमीत पालेकार, अॅंथनी डिसिल्चा, अंबर आमोणकार हांचीं भाशणां जालीं. शांतिकायेन मागणी करपाचो निश्चेव सभेंत सगल्यांनी उक्तायलो. सेंट फ्रान्सीस झेवियर शव प्रदर्शन सुवाळ्याचे फाटभुंयेर वेलिंगकार हांकां तडीपारीची ख्यास्त दिवप योग्य जातले, अशें लोकांनी निवेदनांत म्हणलां.
वेलिंगकार हांणी सेंट झेवियर हांचे विशीं जीं उतरां काडल्यांत तीं अयोग्य आसात. आमच्या देशांत सर्वधर्म समभाव आसा. सगळ्या धर्मांचो आदर करपाक जाय. पुराय गोंयांत वेलिंगकार हांचे अटकेची मागणी जायत आसतना भाजप सरकारांतले मंत्री आनी आमदार ओग्गी आसात. निदान क्रिस्तांव आमदारांनी ह्या प्रस्नाचेर भुमिका स्पश्ट करची. शक्य जायना, जाल्यार पदांचे राजिनामे दिवचे, अशी मागणी प्रसाद हरमलकार हांणी केली. सेंट फ्रान्सीस झेवीयर हांचो अपमान करपी वेलिंगकार हे विचारान हिंदू आसपाक शकनात. आपूण हिंदू आसलों तरी सगळ्या धर्मांचो आदर करता. भगवद्गीता तशेंच हिंदूंचे चडशे धर्मग्रंथ, संत सगळ्या धर्मांचो आदर करपाची शिकवण दितात. प्रा. वेलिंगकार हिंदू आशिल्ले जाल्यार सेंट फ्रान्सीस झेवियर हांचो अपमान करपी उतरां तांच्या तोंडांतल्यान येवचीं नासलीं, अशें आम आदमी पक्षाचे गोंयचे मुखेली अॅड. अमीत पालेकार हांणी सांगलें. ह्या वेळार हेर उलोवप्यांनीय विचार मांडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
