भांगरभूंय | प्रतिनिधी
म्हापशें, प्रतिनिधी ः कामुर्ली कोमुनिदादीन सनबर्न ह्या संगीत महोत्सव आयोजनाचो प्रस्ताव बसके वेळार भायर मारलो. फुडलीं पांच वर्सां अश्या ईडीएम महोत्सवांक गांवांत परवानगी दिवची न्हय असो निर्णयूय हे बसकेंत घेतलो. हो महोत्सव जावचो न्हय म्हणून थळाव्यांनी विरोधाची खर भुमिका घेतिल्ली.
आयतारा सकाळीं पंचायत सभाघरांत सुमार देड वर ही कोमुनिदादची बसका दाराआड चल्ली. थळाव्यांनी एकमतान गांवच्या पठाराचेर सनबर्न आयोजीत करपाक विरोध केलो आनी तसाचो थाराव सगळ्यांच्या मतान मंजूर केलो.
कोमुनिदादच्या जाग्यार सनबर्न आयोजीत करपा खातीर परवानगी दिवची, असो प्रस्ताव स्पेस बाऊंड वेब लॅब्स प्रायव्हेट लिमिटेड हे कंपनी वतीन उत्तर गोंय कोमुनिदाद प्रशासक कार्यालया कडेन सादर केल्लो. उपरांत हो प्रस्ताव कामुर्ली कोमुनिदाद कडेन धाडून दिल्लो. ते प्रमाण कोमुनिदादीन आपल्या गांवकारांची बसका आपयिल्ली. हे बसकेंत वट्ट १९८ गांवकारां मदले फकत ६८ गांवकार हजर रावले. बसकेच्या सभाघरा भायर सनबर्नाक विरोध करपाक थळावे व्हडा संख्येन हजर आशिल्ले.
बसका सोंपले उपरांत कोमुनिदादचे अध्यक्ष वासुदेव नायक गांवकार आनी ऍटर्नी हरि प्रभू हांणी सांगलें, सनबर्न आयोजना खातीर सुवात दिवपाचो प्रस्ताव आयिल्लो. हाचे बसकेक सविस्तर चर्चा जाली आनी एकमतान सनबर्नाक गांवांत परवानगी दिवची न्हय, असो थाराव संमत केलो. अंदूं तशेंच फुडलीं पांच वर्सां ह्या महोत्सवाच्या आयोजनाक परवानगी दिवची न्हय अशें थारायलें. लोकांच्या मना प्रमाण गांवकारांनी हो निर्णय घेतला अशें तांणी सांगलें.
आदले सरपंच शरद गाड हांणी सांगलें, सनबर्नाक लागून गांवचो फायदो जावपाचो नाशिल्लो. मात गांवची शांतिकाय भंग जावपाची. नियोजीत जाग्यार सैमीक संपत आनी जागृत गोबरेश्वर देवस्थान आसा. ह्याच देवान सगळ्यांच्या मनात विचार घालून, एकमतान महोत्सवाक विरोध करीत आयोजकांचो प्रस्ताव भायर मारलो.
अशे तरेचे घुवळे वखदांचो वेव्हार जावपी महोत्सव आमकां गांवांत नाकाच. मात कांय जाणांनी हो महोत्सव हांगाच जावचो हे खातीर यत्न करून गांवकारांक त्रासांत घालपाचें थारायिल्लें. मात गावकारांनी तांचे विचार काबार करून उडयले, असो दावो गाड हांणी केलो.
मजगतीं, कामुर्ली कोमुनिदादान आपली सुवात सनबर्नचें आयोजन करपाक न्हयकारिल्ल्यान आतां ह्या ईडीएमच्या आयोजकांक महोत्सवा खातीर हेर सुवातेचो सोद घेवचो पडटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
