भांगरभूंय | प्रतिनिधी
प्रा. वेलिंगकारांक तडीपार करपाची आंदोलकांची मागणी
पणजी, प्रतिनिधी : सेंट फ्रान्सीस झेवीयर हांचे विशी प्रा. सुभाष वेलिंगकार हांणी जें वक्तव्य केलां ताचेर भारतीय जनता पक्षाच्या क्रिस्तांव मंत्री आनी आमदारांनी बेगीन आपली भुमिका स्पश्ट करची. जाहीरपणान भुमिका स्पश्ट करप शक्य ना जाल्यार तांणी पदाचो राजीनामो दिवचो, अशी मागणी पोरणें गोंयां जाल्ले जाहीर सभेत उलोवप्यांनी केली. प्रा. वेलिंगकार हांचे अटकेची मागणी पुराय गोंयांत जायत आसतना भाजपांतले क्रिस्तांव मंत्री आनी आमदार ओगी कित्याक आसात, असो प्रश्न जायत्या जाणांनी जाहीर सभेत केलो.
सेंट झेवीयर हांच्या अवशेशाची डीएनए चांचणी जावची, ह्या प्रा. वेलिंगकार हांच्या वक्तव्याचेर पुराय गोंय तापलां. लागीं लागीं धर्मीक फूट पडपाचो वेळ आयला. आयतारा लेगीत सगळे कडेन तांचे अटकेची मागणी जाली. पोरणें गोंय, दिवाडी, माशेल वाठारांतल्या लोकांनी एकठांय येवन पोरणे गोंय पुलिशेंत वेलिंगकार हांकां तडीपार करपाची मागणी करपी निवेदन सादर केले. उपरांत लोकांनी निशेद मोर्चो काडलो. पोरणें गांय गांधी सर्कला कुशीक जाहीर सभा जाली. प्रसाद हरमलकार, आपचे गोंय फाट्याचे मुखेली अॅड. अमित पालेकार, अॅंथनी डिसील्चा, अंबर आमोणकार हांचीं भाशणां जालीं. शांतिकायेन मागणी करपाचो निश्चेव सभेंत सगल्यांनी उक्तायलो. सेंट फ्रान्सीस झेवियर शव प्रदर्शन सुवाळ्याचे फांटभुंयेर प्रा. वेलिंगकार हांकां तडीपारीची ख्यास्त दिवप योग्य जातले, अशें लोकांनी निवेदनांत म्हणलां.
प्रा. वेलिंगकार हांणी गोंयच्या सायबा विशीं जीं उतरां काडल्यांत तीं अयोग्य आसा. आमच्या देशांत सर्वधर्म समभाव आसा. सगळ्या धर्मांचो आदर करपाक जाय. पुराय गोंयांत प्रा. वेलींगकार हांचे अटकेची मागणी जायत आसतना भाजप सरकारातले मंत्री आनी आमदार ओग्गी आसा. निदान क्रिस्तांव आमदारांनी ह्या प्रश्नाचेर भुमिका स्पश्ट करची. शक्य जायना, जाल्यार पदांचे राजिनामे दिवचे, अशी मागणी प्रसाद हरमलकार हांणी केली.
सेंट फ्रान्सीस झेवीयर हांचो अपमान करपी प्रा. वेलिंगकार हे विचारान हिंदू आसपाक शकनात. हांव हिंदु आसलों तरी सगळ्या धर्मांचो आदर करता. भगवद्गीता तशेच हिंदुंचे चडशे धर्मग्रंथ, संत सगळ्या धर्मांचो आदर करपाची शिकवण दितात. प्रा. वेलिंगकार हिंदू आशिल्ले जाल्यार गोंयच्या सायबाचो अपमान करपी उतरां तांचे कडल्यान येवचीं नासलीं, अशें आम आदमी पक्षाचे गोंयचे मुखेली अॅड. अमित पालेकार हांणी सांगलें. ह्या वेळार हेर उलोवप्यांनीय विचार मांडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
