भांगरभूंय | प्रतिनिधी
म्हापशें, प्रतिनिधी ः सेंट फ्रान्सीस झेवियर हांचे कुडीची डीएनए चाचणी करपाची मागणी ही प्रा. सुभाष वेलिंगकार हांचीच न्हय. ह्यान पयलीं तीं खुबश्या जाणांनी केल्या. आमचीय हीच मागणी आसा. जर आमच्या सराचेर अटकेची कारवाय जाल्यार पुराय गोंय पेटून उठ्ठलें, अशी शिटकावणी दिवन सरकार हाडपी चेंपणाचो वेलिंगकार समर्थक हिंदू भावांनी निशेध केलो.
डीएनए तपासणेच्या वेलिंगकार हांच्या वक्तव्याक लागून क्रिस्तांव भावांनी राज्यभर आंदोलन सुरू केलां. तांचे मागणे प्रमाण वेलिंगकार हांचे आड पुलिशेंत गुन्यांव नोंद जाला. तांकां अटक करपाची तयारी पुलिसांनी केल्या. मात ते सोदूनय खंयच मेळनात.
हे फाटभूंयेर आयतारा ६ ऑक्टोबराक सकाळीं म्हापशेंच्या बोडगेश्वर मंदिर आंगणांत भारत माता की जय संघटणेच्या नेतृत्वा खाला कांय हिंदू भावांनी वेलिंगकरांच्या समर्थना खातीर बसका घेवन तांचे मागणेक तेंको दिलो. तशेंच गोंयच्या सगल्या हिंदुंनी एकसंध जावचें असो उलो मारलो. ताचे पयलीं बोडगेश्वर देवाक गाराणें घालें. ह्या वेळार साबार हिंदू संघटणांचे वांगडी हजर आशिल्ले.
भारत माता की जय संघटणेची रोशन सामंत हांणी सांगलें, आमच्या वेलिंगकार सरांच्या डीएनए चाचणेचे मागणेन कोणाच्योच धर्मीक भावना दुखावपाचो प्रस्नूच येना. हातूंत भावना आनी श्रद्धेचो कांयच संबंद ना. ही तपासणी जाल्यार, ज्या व्यक्तीचेर आपली श्रद्धा आसा, ती कूड तांचीच काय आनी कोणाची हें सत भायर येतलें. हातूंत धर्म, जात, राष्ट्र येवपाक जायना. क्रिस्तांव भावांनी बेश्टोच हे गजालीचेर बोवाळ करचो न्हय. हो वेळ आंदोलन करपाचो न्हय, तर शाणे जावपाचो आसा.
खर्या कागदपत्रांच्या आदाराचेर वेलिंगकार सरांनी ही मागणी केल्या. आमी सरांक कशीच अटक जावपाक दिवचे नात. तांचो आवाज बंद करपाक दिवचे नात. संवसारा मुखार सत कितें तें हाडपाक कोणूच आडावपाक शकना, अशें रोशन सामंत हांणी सांगलें.
मारूती करमली हांणी सांगलें, हातकातरो खांब्याचें पुनर्वसन जावपाक जाय, अशी मागणी तांणी केली.
ज्या सुवाळ्यांचेर सरकारां ४०० कोटी रूपया तेंय आमच्या करांतल्या खर्च करता, ताचेर आमकां उलोवपाचो अधिकार आसा. वेलिंगकार सरांनी केल्ली मागणी ही घटनात्मक. ह्या विशयाचेर बोवाळ करपी आंदोलकांचेर खर कारवाय करची. वेलिंगकार सरांचेर कारवाय जाल्यार धर्म राखपाक गोंयांतले सगळे हिंदू एकठांय येतले, अशी शिटकावणी सत्यविजय नायक हांणी दिली.
हे बसकेंत रूपेश सावंत, रमेश नायक, गजानन मांद्रेंकार, गणेश माटणेकार, सृजन नायक, जयेश थळी आनी हेरांनी मनोगत उक्तावन वेलिंगकार सरांचे मागणेक फाटबळ दिलें. उल्हास पाळणी हांणी सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
