भांगरभूंय | प्रतिनिधी
आंदोलन स्थगीत जावनूय रस्त्यार राविल्ल्यांक धांवडावपाक लाठीमार
गुन्यांव नोंद, तरी लेगीत आंदोलक आक्रमक
भांगरभूंय । प्रतिनिधी
मडगांव/ पणजीः सेंट फ्रान्सीस झेवियर हांच्या अवशेशा संबंदी केल्ल्या विधाना खातीर राष्ट्रीय स्वयंसेवक संघाचे गोंयचे आदले मुखेली प्रा. सुभाष वेलिंगकार हांचे आड गुन्यांव नोंद जाला. शेनवारा मडगांवां, पणजे सयत गोंयभर ख्रिस्ती भावीक वेलिंगकार हांचे आड आक्रमक जाल्ले दिसले. तांणी खर आंदोलन सुरू केलें. पुलीस वेलिंगकार हांकां सोदतात. वेलिंगकार हांणी अटक जातली ह्या भंयान सत्र न्यायालयांत जामीन अर्ज दाखल केल्लो. पूण न्यायालयान तांकां थाकाय दिवंक ना. ते खातीर सर्वोच्च न्यायालयाच्या निर्णया प्रमाण पुलीस तांचेर अटकेची कारवाय करपाक शकतात. आंदोलकांनी मडगांवचें आंदोलन शेनवारा स्थगीत केलें. पूण आयतारा अटक केली ना जाल्यार परतून सस्त्यार देंवपाची शिटकावणी दिल्या. मजगतीं, उसरां कांय आंदोलकांचेर मडगांवां लाठीमार जालो.
पोरणें गोंयच्या सेंट फ्रान्सीस झेवियर हांच्या एक्स्पोझिशनाची सरकारान नेटान तयारी केल्या. हे फाटभुंयेर सुभाष वेलिंगकार हांणी दर वर्सा प्रमाण अंदूंय ह्या विशयाचेर विधानां करपाक सुरवात केलीं. हे खेपे तांणी सेंट फ्रान्सीस झेवियर हांचे कुडीची डीएनए चांचणी करपाची मागणी सरकारा कडेन केली. हाचे वयल्यान झेवियर हांचें सर्वधर्मीय भावीक आक्रमक जावपाक लागले उपरांत दिवचल पुलिसांनी वेलिंगकार हांचे आड गुन्यांव दाखल केलो. पूण ह्या प्रकरणांत वेलिंगकार हांकां अटक जावपाकूच जाय, अशी मागणी करीत शेनवारा भाविकांनी रस्त्याचेर देंवून आंदोलनां सुरू केलीं.
मडगांव, पणजी, कळंगूटे, काणकोण वाठारांतल्या भाविकांनी आंदोलनां खर केलीं. ताळगांवच्या भाविकांनी पणजी पुलीस मुख्यालयांत येवन वेलिंगकार हांकां अटक करपाची मागणी लावन धरली. वेलिंगकार हांच्या विधानाक लागून दुखवल्ल्या स्श्टी आनी हेर वाठारांतल्या भाविकांनी मडगांव पुलीस मुख्यालया भायर गर्दी केली. ते उपरांत ओल्ड मार्केट सर्कला कडेन वचून येरादारी आडायली आनी वेलिंगकार हांकां अटक जाय मेरेन आंदोलन चालूच दवरपाचो निश्चेव केलो. मडगांवांतल्या आंदोलनाक लागून येरादारेची कोंयडी जावन ताचो मार लोकांक सोंसचो पडलो.
उपजिल्होधिकारी, मामलेदारांक निर्देश
गोंयांत जातीच्या विशया वयल्यान संवेदनशील स्थिती निर्माण जाल्ल्यान तशेंच विवीध संघटणां वतीन आंदोलनां चालू आशिल्ल्यान कायदो आनी सुवेवस्था हाताळपा खातीर आपापल्या कार्यक्षेत्रांत हाजीर रावचे, अशे निर्देश उपजिल्होधिकारी, मामलेदारांक सरकारा कडल्यान दिल्यात.
मडगांवां येरादारीची समस्या
मडगांवां कोलवा सर्कला कडेन आंदोलकांनी रस्तो बंद केल्ल्यान मेळटा त्या मार्गान पुलिसांनी येरादारी घुंवडायली. येरादारी घुंवडायल्या हे लक्षांत येताच आंदोलकांनी सर्कला कडल्यान मडगांव कदंब बसस्टॅण्डा मेरेन येवन थंय रास्ता रोको केलो. कांय लोकांनी गाडयो काडून येरादारीक वाट मेकळी करपाचो प्रकार जाताच वादावादी आनी मारपेट करपाचेय प्रसंग उप्रासले. पूण पुलिसांनी शांततायेन परिस्थिती हाताळपाचे यत्न केले.
पुलीस, मामलेदाराचे यत्न अपेशी
आंदोलकांनी मडगांवचे चडशे रस्ते बंद केले उपरांत लोकांक ताचो त्रास सोंसचो पडलो. पुलीस अधिक्षक सुनिता सावंत हांणी आंदोलकांची भेट घेवन तांची समजूत काडटना वेंलिंगकार हांचो सोद चल्ला, तांचेर कारवाय जातली, अशें सांगलें. पूण आंदोलकांनी तांचें कांयच आयकून घेतलें ना.
मामलेदार प्रताप गांवकार हांणी लेगीत आंदोलकां कडेन चर्चा केली. लोकांक त्रास जातात, रस्ते मेकळे करात अशी मागणी तांणी केली. त्या वेळार आंदोलकांनी गोंय सरकाराक वेलिंगकार हाका अटक करपाक सांगात, दोन मिण्टांनी रस्ते मेकळे करता, अशें स्पश्ट केलें.
पर्यटक, विद्यार्थ्यांचे हाल
मडगांव ओल्ड मार्केटा लागसार रास्ता रोको केले उपरांत आंदोलकांनी कदंब बसस्टॅण्डा कडेन धांव घेतली. तशेंच कांय जाणांनी रवीन्द्र भवन सर्कला कडले रस्ते बंद केले. समाज वावुरपी प्रतिमा कुतिन्हो आनी वॉरेन आलेमांव हांणी कदंब तिकेट कावंटराचेर कर्मचाऱ्याक काम बंदग करपाक सांगलें आनी प्रवाशांक वचपाक सांगलें. तशेंच लांकडाचीं तोडां घालून बशी आडायल्यो.
आंदोलनाक लागून येरादारी वेवस्था बंद पडिल्ल्यान पर्यटना खातीर आयिल्ल्या पर्यटकांक बशींतल्यान देंवून चलत वच्चें पडलें. तशेंच शाळा, म्हाविद्यालयां सुटले उपरांत विद्यार्थ्यांक लेगीत पालकांच्यो गाडयो फुडें येनाशिल्ल्यान चलत वच्चें पडलें. खाजगी बशींतल्यान प्रवास करपी प्रवाशांक लेगीत गाडी आडावन खाला देंवोवपाचें प्रकार घडले.
फा. बोल्मेक्साचे सल्ले
गोंयकार जागृत जाल्यात ही बरी गजाल, पूण जागृत जातनाच आपल्या कडल्यान दुसऱ्या भशेनूच वावर जावचो ना, हाची जतनाय घेवपाची गरज आसा. गोंयाक सध्या शांतिकायेची गरज आसा. धर्मीक वाद नाकात. ते खातीर कोणेय कितेंय म्हणलें जाल्यार लेगीत आपले मदलीं शांतिकाय कायम दवरात. लोकांक त्रास जावचो ना हाचीय जतनाय घेयात.
भावना दुखवल्ल्यान आंदोलन करून ताची जाणीवल करून दिवप गरजेचें आशिल्लें. दुसरो कोणूय आपल्यो भावना दुखोवपाक शकना, हो आपलो भावार्थ. सेंट फ्रान्सीस झेवियर हांकाय हाचो कसलो फरक पडटलो, अशें दिसना. ते खातीर शांतिकाय सांबाळुया. ते करतात तशेंच आमीय केल्यार तांचे आनी आमचे मदीं कसलोच फरक उरचो ना. ते खातीर कोणे कितें म्हणलें, कोणाक अटक जाली काय जावंक ना, हे विशय सोडात. कांय जाणांक धर्मीक किल्लोस जाय, धर्मा- धर्मां मदीं फूट घालपाचें तांचें कारस्थान आसा, हें वळखात.
गोंयच्यो जमनी हडप करपाची जी प्रक्रिया सरकारान सुरू केल्या, ताचे वयल्यान दुसरे कडेन लक्ष घुंवडापाचो हो यत्न आसा. आतां मेरेन जाल्ल्या आंदोलनान सरकाराचें लक्ष ओडून घेतलां. ते खातीर लोकांच्यो भावना सरकारा मेरेन पावल्यात, तें खूब जालें. जमनी सांबाळपा खातीर सगळे एकवटीत रावुया, अशें फा. परेरा हांणी म्हणलां.
फुडली सुनावणी फाल्यां
अटक जातली ह्या भंयान सुभाष वेलिंगकार हांणी पणजी सत्र न्यायालयांत अटकपूर्व जामीन अर्ज दाखल केला. तांच्या अर्जाचेर न्यायालयान सुनावणी घेतली, पूण तांकां अंतरीम थाकाय दिवंक ना. ह्या प्रकरणांत न्यायालयान पुलिसांक म्हणणें मांडपाचे निर्देश दिल्यात. फुडली सुनावणी फाल्यां सोमारा दवरल्या.
फातोड्डें, मायणा कुडटरींत कागाळ दाखल
सुभाष वेलिंगकार हांणी धर्मीक भावना दुखयल्ले खातीर फातोड्डें वाठारांतले भावीक सकाळीं पुलीस स्टेशनार गेले. थंय पुलिसांक निवेदन दिवन वेलिंगकार हांकां अटक करपाची मागणी केली. तशेंच राशोल, लोटली, कामुर्ली वाठारांतल्या लोकांनी एकठांय येवन मायणा कुडटरी पुलिशेंत कागाळ नोंद केली.
बॉल्मेक्सा वरींच वेलिंगकार हांचेर कारवायः मुख्यंमंत्री
छत्रपती शिवाजी महाराज प्रकरणांत फातर बोल्मेक्स परेरा हांचेर जे पद्दतीन कारवाय जाल्ली, तशीच कारवाय सुभाष वेलिंगकार हांचेर लेगीत जातली. सगळ्यांक समान न्याय दितले. ते खातीर रस्ते आडावन कोणेच कायदो हातांत घेवचो न्हय. गोंयांत धर्मीक किजील निर्माण करपाचे यत्न करचे न्हय, असो उलो मुख्यमंत्री डॉ. प्रमोद सावंत हांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
