भांगरभूंय | प्रतिनिधी
मंत्री हळर्णकारः गोंयचे हद्दींत चलतालें बूल ट्रॉलींग
भांगरभूंय | प्रतिनिधी
पणजीः गोंयचे दर्या शिमेचेर बेकायदेशीर रितीन भितर सरून बूल ट्रॉलींग करपी मालपे कर्नाटकांतल्यो दोन बोटी नुस्तेमारी खात्यान जप्त केल्यात. शेनवारा फातौडेर 5 वरांच्या सुमाराक ही कारवाय केली. धरिल्ल्या बोटींतल्या नुस्त्याची पावणी करून बोट धनयांचेर खर कारवाय करतले, अशें नुस्तेमारी मंत्री नीळकंठ हळर्णकर हांणी सांगलें.
फाटल्या कांय दिसां सावन थळाव्या नुस्तेकारांनी मालपेंतल्यान बोटी गोंयच्या दर्या शिमे भितर सरून बेकायदेशीर रितीन नुस्तेमारी करतात अशी कागाळ केल्ली. हे विशीं कांय दिसां आदीं पुलिशेंतूय कागाळ दाखल जाल्ली. हाचे उपरांत मंत्री नीळकंठ हळर्णकार हांणी कर्नाटक नुस्तेमारी खात्याच्या वरिश्ठ अधिकाऱ्यां कडेन चर्चा केली. पूण तरी लेगीत मालपे सावन बोटी गोंयांत येवप चालूच आशिल्लें. हाचे उपरांत नुस्तेमारी खात्यान अश्यो घडणूक आडावपा खातीर एक टास्क फोर्स नेमलो. मुख्यमंत्री डॉ. प्रमोद सावंत हांणी लेगीत अशा बोटींचेर खर कारवाय करपाची शिटकावणी दिल्ली. हाचे उपरांत शेनवारा फांतोडेर ही कारवाय केल्या. हे कारवाये वेळार आनीक दोन बोटी पळून वचपाक येसस्वी जाल्यो. जप्त केल्ल्यो बोटीं पणजी जेटीर हाडल्यात. हाचें फुडेंय अशी कारवाय चालूच उरतली अशें मंत्री हळर्णकार हांणी म्हणलां.
दंडाची रक्कम वाडोवपाचो प्रस्ताव
मुख्यमंत्री डॉ. सावंत हांणी दिल्ल्या आदेशा प्रमाण शुक्रारा खात्याच्या अधिकाऱ्यांची बसका जाली. ते प्रमाण आमी शेनवारा ही कारवाय केल्या. जप्त केल्ल्या बोटींचेर कायद्या प्रमाण कारवाय जातली. दंडाची रक्कम 10 लाख रुपया मेरेन वाडोवपाची प्रक्रिया खात्यान सुरू केल्या. कायद्यांत बदल जाल्यार ही रक्कम वाडटली, अशें नुस्तेमारी खात्याचे अधिक्षक चंदेश चंद्रेश हळदणकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
