भांगरभूंय | प्रतिनिधी
भारत आनी बांगलादेश ह्या पंगडां मदीं आयच्यान तीन मॅचींची टी-20 माळ सुरू जाता. दोन टॅस्टींची माळ भारतान 2-0 अशा फरकान जिखल्या आनी टी-20 माळेंत लेगीत क्लीन स्वीप करपाचो ताचो यत्न आसतलो.
रोहीत शर्मा, विराट कोहली आनी रवींद्र जडेजा हे आंतरराष्ट्रीय टी-20तल्यान निवृत्त जाल्या उपरांत पंगड परिवर्तनाच्या टप्प्यातल्यान वता. तशेंच शुभमन गील, ऋषभ पंत आनी अक्षर पटेल ह्या नियमीत खेळगड्यांक विसव दिला. ताका लागून तांचे गैरहाजेरेंत नवीन चेरे आपलो ठसो उमठोवपाक सज्ज आसात. हातूंतलो मुखेल खेळगडो म्हणल्यार मयांक यादव. अंदूंचे आयपीएलांत लखनौ सुपर जायण्ट्स वतीन खेळतना ताणें उत्कृश्ट प्रदर्शन केल्लें. पूण, दुखापतीक लागून ताका संपुर्ण हंगाम खेळपाक मेळूंक नाशिल्लो. तंदुरुस्तींतल्यान तो आतां पुर्ण बरो जाला, दोळे दिपकावपी प्रदर्शन करून राष्ट्रीय पंगडांतली आपली सुवात घट करपाचो ताचो यत्न आसतलो.
ओपनर अभिषेक शर्मा कडल्यान आक्रमक बॅटिंगेची आस्त आसतली. खासा करून पावरप्लेंत. वर्साचे सुरवातीक भारताचो पंगड झिम्बाब्वेचे भोंवडेर गेल्लो. थंय अभिषेकान 47 बॉलांनी 100 धांवड्यो केल्ल्यो. ओपनर शुभमन गिलाचे गैरहाजेरेक लागून मेळिल्ले संदीचो फायदो करून घेवपाचो ताचो यत्न आसतलो.
अणभवी विकेटकीपर बॅट्समन संजू सॅमसना वांगडा मेळून अभिषेक डावाची सुरवात करपाक शकता. दुसरे वटेन संजू सॅमसनाची अंदूं जाल्ले संवसारीक टी-20 सर्ती खातीर भारताच्या पंगडांत निवड जाल्ली. पूण, ताका एकूय मॅचींत खेळपाची संद मेळूंक नाशिल्ली. ताका लागून तो लेगीत स्वताक सिद्ध करपाक इत्सूक आसतलो.
स्पिनर म्हणून वॉशिंग्टन सुंदर आनी रवी बिश्नोई हांकां निमाण्या इकरांत सुवात मेळुये. वॉशिंग्टन सुंदर बॅटींग लेगीत वेवस्थीत करता, ताका लागून ताची उपस्थिती पंगडांत संतूलन हाडटा. तिसरो स्पिनर म्हणून वरुण चक्रवर्तीची निवड केल्या. पूण, ताका आयचे मॅची खातीर पंगडांत सुवात मेळपाची शक्तताय उणी आसा.
मजगतीं, ग्वालेरांत 14 वर्सांनी पयली आंतरराष्ट्रीय मॅच जाता. कॅप्टन रुप सिंग स्टेडियमाचेर 14 वर्सां पयलीं वन डे मॅच जाल्ली. ते मॅचींत सचिन तेंडुलकरान दोट्टी शेंकडो नोंदयिल्लो. ताणें दक्षीण आफ्रिके आड नाबाद 200 धांवड्यांची खेळी केल्ली.
आयची मॅच श्रीमंत माधवराव सिंधिया क्रिकेट स्टेडीयमाचेर जातली. ह्या मैदाना वयली ही पयली आंतरराष्ट्रीय मॅच आसा. हाचे पयलीं ह्या मैदानाचेर देशांतर्गत क्रिकेट मॅची जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
