प्रा. वेलिंगकार प्रकरण तापलेः तांचे अटकेचे मागणे खातीर आंदोलन
भांगरभूंय | प्रतिनिधी
मडगांव, प्रतिनिधी ः धर्मीक भावना दुखोवपाच्या प्रकरणांत प्रा. सुभाष वेलिंगकार हांचेर गुन्यांव नोंद जाले उपरांत लेगीत शेनवारा सकाळीं क्रिस्तांव भाव-भयणी व्हड प्रमाणांत रस्त्यार देंवले आनी मडगांव पुलीस मुख्यालयाच्या भायर गर्दी केली. ते उपरांत ओल्ड मार्केट सर्कल लागसार वचून तांकां अटक जाय मेरेन निशेध करपाचें थारायलें आनी येरादारी आडायली. हाका लागून येरादारी कोंयडी जाली.
सुभाष वेलिंगकार हांणी सेंट फ्रान्सिस झेवियरा विशीं आक्षेपार्ह विधान केल्लें. क्रिस्तांव भावांनी राज्यभरांतल्या वेगवेगळ्या पुलीस स्टेशनांनी कागाळ करून लेगीत गुन्यांव नोंद जावंक नाशिल्ल्यान शुक्रारा सांजवेळार नागरिकांनी दक्षीण गोंय पुलीस मुख्यालयांत मोर्चा काडलो. हातूंत सगल्या धर्माच्या लोकांचो आसपाव आसलो. ह्या वेळार पुलीस मुख्यालयाच्या भायर व्हड पुलीस बंदोबस्त दवरलो. रातीं उसरां दिवचल पुलीस स्टेशनांत गुन्यांव नोंद जाले उपरांत पुलिसांनी ही म्हायती आंदोलनकारांक दिली. पूण ते उपरांत लेगीत काँग्रेसीचे खासदार, आमदार, आप कार्यकर्ते रातच्या १ वरां मेरेन ओल्ड मार्केट सर्कलाचेर रावून आंदोलन करताले. शेनवारा सकाळीं सावन परतून आंदोलन सुरू जालें. मडगांव पुलीस मुख्यालयांत गर्दी करुन क्रिस्तांव भावांनी प्रा. वेलिंगकार हांकां अटक करपाची मागणी केली.
फातोड्ड्यां, मायणा कुडटरी कागाळ दाखल
प्रा. वेलिंगकार हांणी धर्मीक भावना दुखयल्ल्या प्रकरणांत फातोड्ड्यां वाठारांतले नागरिक सकाळीं पुलीस स्टेशनांत पावलें. पुलिसांक निवेदन दिवन प्रा. वेलिंगकार हांचेर कारवाय करपाची मागणी केली. गुन्यांव नोंद करून फुडली कारवाय सुरू आसा अशें पुलिसांनी सांगलें. ते उपरांत मडगांव पुलीस स्टेशनाचेर आंदोलन पावलें. हाचे भायर राशोल, लोटली, कामुर्ले ह्या नागरीकांनी एकठांय येवन मायणा कुडटरी पुलिशेंत कागाळ नोंद केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
