भांगरभूंय | प्रतिनिधी
केंद्रीय उदका आयोगाची पळोवणी, गोंयाक बायपास
उदका स्रोत खात्याच्या अधिकाऱ्यां मदीं दुगदूग
आयोगा कडेन गोंय सरकार मागतलें स्पश्टीकरण
भांगरभूंय । प्रतिनिधी
पणजीः केंद्रीय उदका आयोगाच्या पंगडान शुक्रारा विर्डी आनी अंजूणे ह्या दोन धरणांची पळोवणी केली. पूण म्हादय वादा कडेन संबंदीत आशिल्ल्या ह्या दोन धरणांचे पळोवणे संबंदांत तांणी गोंयच्या म्हादय विभागाक कसलीच पूर्वकल्पना दिवंक ना. म्हत्वाचें म्हणल्यार अचकीत पळोवणी करपा फाटलें कारण दिवंक नाशिल्ल्यान उदका स्रोत खात्यांतल्या अधिकाऱ्यां मदीं दुगदूग वाडल्या.
गोंय कर्नाटक आनी महाराष्ट्रांतलो म्हादय न्हंयेचो वाद सध्या सर्वोच्च न्यायालयांत आसा. ह्या प्रस्नाचेर सर्वोच्च न्यायालयांत सुनावणी चालू आसतना केंद्रीय उदका आयोगान कर्नाटकाच्या कळसा- भांडुरा संबंदातल्या सविस्तर प्रकल्प अहवालाक (डीपीआर) मान्यताय दिल्ली. हाचे वयल्यान गोंयांतलें राजकारण तापिल्लें.
विरोधी आमदारांनी हाचे वयल्यान विधानसभा सभाघर आनी सभाघरा भायर लेगीत सत्ताधाऱ्यांचेर आरोपांचो शिंवर केल्लो. ते उपरांत केंद्र सरकारान गोंय सरकाराचे मागणे प्रमाण ‘प्रवाह’ समितीची स्थापना केल्ली. हे समितीन पावसाळ्यांत गोंय, कर्नाटक आनी महाराष्ट्राचे हद्दींतल्या म्हादय देगणाची पळोवणी करून अहवाल सादर केलो. पूण म्हादय न्हंयेचें उदक घुंवडावपा खातीर कर्नाटकान केल्ल्या कामांचो उल्लेख ह्या अहवालांत नाशिल्ल्याचें कळ्ळे उपरांत गोवा फॉरवर्डाचे अध्यक्ष तशेंच आमदार विजय सरदेसाय हांणी सरकाराक प्रस्नार प्रस्न विचारले. ताका लागून सरकारान कांय दिसां आदीं प्रवाह समिती कडेन परतून पळोवणेची मागणी केल्या.
हे फाटभुंयेर केंद्रीय उदका आयोगाच्या पंगडान गोंयांतल्या म्हादय विभागाक कसलीच म्हायती दिनासतना विर्डी आनी अंजुणें धरणाची पळोवणी केल्ल्यान उदका स्रोत खात्याच्या अधिकाऱ्यां मदीं घुस्पागोंदळ निर्माण जाला.
ह्या प्रकाराची म्हायती गोंय सरकाराक दिल्या. सरकार बेगिनूच हे पळोवणे संबंदांत आयोगा कडल्यान स्पश्टीकरण मागतलें, अशें गोपांनी म्हणलां.
विरोधक अदीक आक्रमक जावपाची शक्यताय
कर्नाटकाच्या ‘डीपीआरा’क मंजुरी आनी प्रवाहाची पळोवणी ह्या दोन गजालीं वयल्यान खुबळिल्ले विरोधी आमदार आतां आयोगाचे पळोवणे वयल्यान आनीक आक्रमक जावपाची शक्यताय आसा. वयल्यान कर्नाटकान डीपीआराचो मुद्दो फुडें करून भांडुरा कानालाच्या कामाक गती दिवपाच्यो हालचाली सुरू केल्यात. कर्नाटका कडल्यान सुरू आशिल्लीं हीं गुप्त कारस्थानां तत्काळ आडावपाक येस मेळ्ळें ना जाल्यार विरोधक म्हादय विशया वयल्यान सरकाराक परतून एकदां आरोपीच्या पांजऱ्यांत उबे करपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
