भांगरभूंय | प्रतिनिधी
जमीन पुसता, सान्न मारता. भुरग्यांक ल्हानांची व्हड करतना घरान दुयेंत जावन पडिल्ल्या घोवाची सेवा करता. हीच तर माँ दुर्गा देवी.
नवरात्रांचे णव दीस आमी उमेदीन मनयतात. उमा, गौरी, पार्वती, जगदंबा, भवानी हीं देवींचीं शांत रूपां. दुर्गा, काली, चंडी, भैरवी, चामुंडा ही रागिश्ट रूपां. अशींच रूपां एके अस्तुरेंत पळोवक मेळटात. ती केन्ना उमा, गौरी, पार्वती जावन घोवा, भुरग्यां फाटल्यांन उबी आसता. तर केन्ना अन्याया आड उबी रावतना तिका दुर्गा, काली, चंडी जावन झगडचें पडटा. अस्तुरेचे जिणेंत पावला पावलार तिका आपलीं रूपां बदलचींच पडटात. हे आमका देवी माँ सांगूंक सोदता. झगडपाक आंगान शक्त आसूंक जाय. दुबळो मनीस तें करूंक शकना. देखून जण एकले अस्तुरेन पयली सक्षम जावंक जाय. शिकून पायार उबें रावपाचें बळगें तिच्या आंगांत आसूंक जाय. हांव दुबळी न्हय, हांव रडचीना. कितलींय अरीश्टां आयलीं तरीय तांकां तोंड दितलीं. कोणाकच भिवचीना, अशें म्हणपाक तिका पयलीं आपल्याक बळिश्ट करूंक जाय. आतां झाशीची राणी जावंक घोडे आनी तरसादी नाकात. आयज संवसारांचो गाडो ओडटले दरेके बायलेच्या वाट्याक आयिल्ल्या आव्हानांक तोंड दितना तिचे भितर झाशीचे राणयेचें रूप दिश्टी पडटा. जाव ती अधिकारी वा घरकाम करपी वावराडी. सवायशिण वा विधवा तिच्या वांट्यांक कितलींशींच आव्हानां आसतात. तांकां तोंड करून निर्भीडपणान फुडें फुडें वता. मळबाक हात लावपाचो हावेस धरता.
अस्तुरे भितरच तर माँ दुर्गाचें रुप आसता. एक वावराडी घरां घरांनी काम करून पयशें जोडून हाडटा. कोणांची आयदना घासता, जमीन पुसता, सान्न मारता. भुरग्यांक ल्हानांची व्हड करतना घरान दुयेंत जावन पडिल्ल्या घोवाची सेवा करता. हीच तर माँ दुर्गा देवी. फांतोडेर उठून घरांतलें काम करून भुरग्यांक शाळेन पावोवप, तांकां घरा हाडप, तांचो अभ्यास घेवप, जेवण खाण करून माय, माव, घोवाची सेवा करप, घर सजोवप, नोकरी करप, णव म्हयने भुरग्याक पोटान दवरून तांकां जल्म दिणारी ही आवय माँ दुर्गा देवी न्हय तर कोण? आनीक खंय सोदूंक वचूंक जाय माँ दुर्गेक? ही तर आमच्याच म्हऱ्यांत आसा. पूण…. कितें तिचो सम्मान जाता? तिका मान मेळटा? देवळांत वचून माँ दुर्गेक पाया पडटात, तिची पुजा करतात. पुण जिवे दुर्गेक सम्मान दिता व्हय? रस्त्यार भोवतल्यो वसवश्यों नदरो, बशींत,
ऑफिसान एक बायल म्हणून तिचेर पडिल्ल्यो वाकड्यो नदरो. त्यो चुकयत चुकयत पावलां मारतना. घोवाच्या खोटांनी मार खातना, आवयच्या नांवांची गाळी आयकतना, माँ दुर्गेक कितें दिसता आसतलें??
– शोभा फुलकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
