देवी चंद्रघंटा

भांगरभूंय | प्रतिनिधी

नवरात्रां : तिसरी माळ

दुर्गेच्या तिसरे शक्तीचें नांव ‘चंद्रघंटा’. नवरात्रांचे तृतीया तिथीक हे देवीचे पुजेक बरेंच म्हत्व आसा. देवीच्या कपलार घांटीच्या आकाराचो चंद्र आसलल्यान तिका चंद्रघंटा देवी अशें म्हण्टात. तिचें चकचकपी आंग भांगरावरीं परजळटा.  धा हात आसलले देवीन दरेका हातांत तलवार, बाणा सारकिल्लीं शस्त्रां घेतल्यांत. हीं सगळीं शस्त्रां घेवन शिंवाचेर बसून देवी झुजाचे तयारेंत आसलल्या वरीं दिसता. देवीची मुद्रा जरी झुजाक वचपाची आसली तरी संकश्ट निवारण करपाक हे देवीची पुजा करतात. देवीचे कृपेन अलौकीक वस्तुंचें दर्शन जाता. देवी चंद्रघंटाचे कृपेन साधकाची सगळीं पापां आनी आडमेळीं नश्ट जातात. तांची उपासना सदांच फळादीक जाता. ताचो उपासक शिंवां वरी वीर आनी निर्भय जाता. ताच्या घांटीचो आवाज सदांच ताच्या भक्तांची दुश्ट आत्म्यां पसून राखण करता. 

झुजाचे मुद्रेन आसपी देवीचें रूप जरी आसलें ती देवी चंद्रघंटा शांतीकारक आनी कल्याण करपी देवी म्हूण मानतात. आपल्या भक्तांची सगळीं पापां आनी संकश्टां देवी पयस करता. देवीच्या चरणार समर्पण  केल्यार घांटीचो आवाज कानांत गुंजत रावता. रुपान सौम्य आनी शांतीमय आसपी चंद्रघंटा देवीची आराधना केल्यार भंय पयस वता आनी म्होंवाळसाणेचो विकास जावन सगळे कुडीची कांती वाडोवपी गुणांची वाड जाता. आवाजांत म्होंवाळपणा येता आनी म्हत्वाची गजाल म्हळ्यार देवीचे भक्त जंय- जंय वता थंय सुख, समाधान आनी शांतिचो अणभव लोकांक येता. देवीची उपासना केल्यार संवसारीक संकश्टा सावन मुक्ती मेळटा.

पुराणीक कथे प्रमाण देवी चंद्रघंटेन अवतार घेतललो तेन्ना दैत्यांचो आकांत संवसारांत वाडलेलो. महिष नांवाचो दैत सांवार घालतालो. असोच एक दीस ह्या दैत्यान देवांचेर हल्लो केलो. ताका सर्ग लोकाचेर आपलें राज्य चलोवपाचें आसलें. ह्या दैत्याक  जाग्यार बसोवपाक म्हूण ब्रह्मा, विष्णू  मेळून शंकरा कडेन गेले. तिगूय रागान इतके खदखदताले की, ते तिगूय एकीकडे जाले उपरांत एक प्रकारचो उजो जालो आनी तांतूल्यान देवी चंद्रघंटा  प्रकट जाली.  देवीक शंकरान आपलें त्रिशूल, विष्णून आपलें चक्र, इंद्रदेवान आपली घांट, सुर्यदेवान आपलें तेज, तरसाद आनी शींव दिलो. हें सगळें घेवन देवी चंद्रघंटान महिषासुराक मारून उडयलो.  

– प्रिता परब