भांगरभूंय | प्रतिनिधी
1940 तली गजाल. शिरदांव हांगा राबितो करपी सांताना आफान्सो ही बायलमनीस सदांच दुयेंत आसताली. वैद्य जाले, गांवठी दोतोर जाले. पूण कांयच फरक पडलो ना. निमाणें तिका एका नामनेच्या दोतोरा कडेन व्हेली, आनी दोतोरान जड काळजान तांचे फामीलीक सांगलें की तिका कॅन्सर जाला. कॅन्सर तिसऱ्या पांवड्यार पावला (Third Stage) थोडेच दीस ती तुमचे वांगडा आसतली. जाता तितली तिका खोशयेन दवरात, तिचेर कसलेंच चेपण हाडूं नकात.
सांताना आफान्सो मनांतल्यान खुबूच दुख्खी जाली. ‘म्हजे जिवितांतले थोडेच दीस उरल्यात न्हय?…’ ती दुखेस्त जावन स्वताकच प्रस्न विचारताली. दोतोर, वैद्यांचे उपाय सोंपले काय मनीस देवाक उगडास करता. सांताना खर देवभक्त आशिल्ली. दीस- रात आपूण बरी जावची म्हणून जेजू कडेन मागणे मागताली. सांजवेळा तांच्या घरा लागींच आशिल्ल्या खुर्सा कडेन तिच्या पोरसांत फुलिल्ल्या रोजांच्या फुलांचो हार घालून ताचे कडेन आपल्या भलायके खातीर मागणे करताली. तिनसांजे खुर्सा कडेन वचून वाती पेटयताली.
मडगांव सावन बांबोळे वतना एक खुरीस लागता. 1940 वर्सा सावन तो अस्तित्वांत आसा. सुरवेक हे सुवातेर सादो फातराचो खुरीस आशिल्लो. सांताना आफान्सो आनी तिच्या कुटुंबान खुर्सा कडेन मागणे मागलें की आफान्सो हिका सडसडीत बरें करीत जाल्यार उक्त्या खुर्सा वयर आमी धांपून घेतात आनी खुर्साची सरभोंवतण नितळ आनी सोबीत करतात.
आनी अजापाची गजाल म्हळ्यार आफान्सो कॅन्सर
दुयेंसांतल्यान खडखडीत बरी जाली. बांबोळेच्या खुर्सान जादू ( Miracle) केलो असो लोकांचो समज जालो आनी थळाव्या लोकांचो खुर्साचेर विस्वास बसलो. हळू हळू ही खबर सरभोंवतणी फांकली. खुर्सा कडेन आपले मागणें मागपी लोक रोजांची फुलां खु्र्साक अोंपपाक लागले.
हळू हळू ह्या Miracle खुर्साची नामना गोंयभर आनी गोंया भायरय जाली. 1969 वर्सा बांबोळे आशिल्ल्या मिलिटरी कॅम्पांतले अधिकारी, सैनीक देवाक भजपा खातीर ( pray) फुलांच्या खुर्सा कडेन येवपाक लागले. थोड्या तेंपान लश्करान (सैनीक) खुर्सा वयर पक्के बांदकाम केलें.
आतां ह्या फुलांच्या खुर्सा फाटल्यान सोबीत आनी सुंदर अशें होलीक्रॉस चर्च व्हड झेतान उबी आसा.
ह्या रस्त्यान वा वाटेन येवपी वचपी हिंदू, किरिस्तांव भाव खुर्सा कडेन रावतात, आपले मागणें मागतात आनी हळडुव्या वा तांबड्या रोजांचो हार (Merry Gold Flowers) ह्या खुर्साक ओंपतात आनी ताका मनां पसून शरण वतात.
दुसरें म्हळ्यार हो हायवे Accident Prone Zone म्हूण कळीत केल्लो आसा. ताका लागून बस चालक, कंडक्टर वा बस, ट्रकाचे पात्रांव मुद्दाम खुर्सा कडेन रावून रोजांचो हार खुर्साक ओंपतात. पूण चडशे बस चालक खुर्सा कडेन पावतकूच दोनदा हॉर्न वाजोवन ‘फुलांच्या खुर्साचें’ बेसांव घेतात.
एकनाथ सामंत
9226219723
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
