भांगरभूंय | प्रतिनिधी
म्होंवाळीं घालपी चोरांचें कर्म. खंय खंय चोरयो केल्यात ताचो आतां उगडास पसून ना
भांगरभूंय । उमेश झर्मेंकार
म्हापशें: पर्वरी पुलिसांनी अटक केल्लो दुबावीत मारिया उर्फ मारियो सांताना बाप्तिस्ता उर्फ सांतान हाचे टोळयेन गोंयांत सुमार 70 परस अदीक घरां फोडल्यांत. फेब्रुवारी ते सप्टेंबर ह्या 7 म्हयन्यांच्या काळांत ताणें ह्यो चोरयो केल्या. ह्या चोरयांनी ताणें कोटींनी रुपयांच्यो वस्तू फारायल्यात. चड करून बार्देस, तिसवाडी, फोंडें आनी मुरगांव ह्या चार म्हालांतले बंगले आनी फ्लॅटांक ताणें लक्ष्य केल्लें.
ह्या चोरी प्रकरणांत टोळयेंतल्या आनीक दोगांक पुलिसांनी अटक केल्या. जाल्यार मडगांवच्या एका नामनेच्या सराफाची पुलिसांनी चवकशी चलयल्या. ह्या सराफान दुबाविता कडल्यान चोरयेच्यो वस्ती खरेदी केल्ल्याचो दुबाव आसा. ह्या सराफाक अटक जावची न्हय, हे खातीर दक्षीणेंतल्या एका राजकारण्यान सगळे तरेचे यत्न चलयल्यात, अशीय खबर मेळ्ळ्या.
पुलिसांनी बुधवारा 2 ऑक्टोबराक म्होंवाळें घालून ऑर्गनायझ्ड चोरयो करपी टोळयेक धरली आनी टोळयेचो मुख्य सुत्रधार तशेंच खांपो चोर मारियो सांताना बाप्तिस्ता उर्फ सांतान (44. रा. ग्रॅण्ड पेडे, बाणावली) आनी मोहम्मद सुफियान शेखमिया (20. रा. कालकोंड- मडगांव) ह्या दोगांक अटक केल्ली. ह्या प्रकरणांत बिरेस्तारा रातीं समर पाल (रा. दवर्ली आनी मूळ हुगली- अस्तंत बंगाल) आनी फिलीप राटो (रा. बाणावली) ह्या दोगांक पुलिसांनी अटक केली.
म्हापशें न्यायालयान दुबावीत मारियो बाप्तिस्ता आनी मोहम्मद शेखमिया ह्या दोगांक 6 दिसांची पुलीस कोठडी फर्मायल्या. जाल्यार दुबावीत समर पाल आनी फिलीप राटो हांकां 7 दीस पुलीस कोठडेंत दवरपाचो आदेश दिला.
दुबावीत समर पाल हो भांगराच्यो वस्ती करपी कारागीर आसा. जाल्यार दुबावीत फिलीप राटो हो मारियो कडल्यान चोरयेच्यो वस्ती घेवन त्यो दुबावीत कारागीर आनी हेर सराफांक विकपी मिडलमॅन (दलाल) म्हूण काम करतालो. ह्या प्रकरणांत आनीक कांय जाणांक अटक जावपाची शक्यताय आसा.
सुमार 8 वर्सांनी फेब्रुवारी 2024 त सक्रीय जावन मारियो बाप्तिस्ता हाणें सांगाती मोहम्मद शेखमिया ह्या म्हाविद्यालयीन तरणाट्या वांगडा घरफोडी करून गोंयांत खवदळ घातिल्लो. घरफोडी खातीर ताणें फक्त बंगले, व्हड घरां आनी आलिशान फ्लॅट वेंचतालो. हे टोळयेन पुलिसां मुखार एके तरेचें आव्हान उबें केल्लें. मात पर्वरी पुलिसांच्या यत्नांक लागून ही टोळी सांपडली. फेब्रुवारी ते सप्टेंबर ह्या 7 म्हयन्यांच्या काळांत हे टोळयेन 70 परस अदीक घरां फोडल्यांत. तातूंतल्यान ताणें कोटींनी रुपयांचो म्हाल फारायला. सध्या ह्या चोरांक आपणे खंय खंय चोरयो केल्यात ताचो उगडास पसून जायना. दुबावितांनी इतल्या व्हड प्रमाणार घरां फोडिल्ल्यान हीं प्रकरणां तांचे कडल्यान वदोवन घेवप हें पर्वरी पुलिसां मुखार एक व्हड आव्हान आसा.
पर्वरी, म्हापशें, शिवोली, साळगांव, नागाळी, दोनापावल, मेरशी, बांबोली, वेळसांव- पाळी हे वरीं बार्देस, तिसवाडी, फोंडें आनी मुरगांव म्हालांतल्या वाठारांक म्होंवाळें घालून चोरी करपी चोरांनी लक्ष्य केल्लें. ह्या वाठारांतलींच घरां फोडून दुबावीत टोळयेन गोंय पुलिशे मुखार आव्हान उबें केल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
