भांगरभूंय | प्रतिनिधी
इन्फोसीस वतीन विद्यालयांक स्मार्ट टॅब्लेट
पणजी, प्रतिनिधी : फाटलीं पांच वर्सां अनुदानीत विद्यालयां परस सरकारी विद्यालयांनी भुरग्यांक शिकपाक घालपा कडेन पालकांचो कल वाडला. हाका लागून सरकारी विद्यालयांचो दर्जो वाडपाक मजत जाता, अशें मुख्यमंत्री डॉ. प्रमोद सावंत हांणी सांगलें. पर्वरे इन्फोसीस स्प्रींगबोर्ड लिमीटेडाच्या वतीन विद्यालयांक स्मार्ट टॅब्लेटस दिवपाचे कार्यावळींत ते उलयताले.
कांय वर्सां पयलीं पालकांचो भुरग्यांक अनुदानीत विद्यालयांनी घालपा कडेन कल आसलो. आतां तो बदलपाक लागला. हाका लागून आनीक कांय वर्सांनी सरकारी विद्यालयांत शिकिल्ले विद्यार्थी इन्फोसीस सारक्या कंपनींत काम करतना हें पळोवपाची संद मेळटली. शिक्षणा सयत आयज विद्यार्थ्यांचे डिजीटल स्कीलींग करपाची गरज आसा. हाकाच लागून इन्फोसीस कंपनीन राज्यातल्या विद्यालयां खातीर देड हजार टॅब्लेट वाटल्यात. एका विद्यालयाक ३० प्रमाण ५० विद्यालयांक टॅब्लेट वाट्टले. टॅब्लेटचो वापर योग्य तरेन करपाची जापसालदारी शिक्षक तशेंच विद्यार्थ्यांची आसा. हे टॅब्लेट प्राधान्यान सरकारी विद्यालयांक मेळटले. गणित, विज्ञान, इंग्लीश सयत हेर विशय शिकपा खातीर टॅब्लेटचो उपेग जातलो. इन्फोसीस संस्थेन ऑनलायन अभ्यासक्रम सुरू केला. ह्या अभ्यासक्रमांचो लाव विद्यार्थ्यांनी घेवपाक जाय. करीयर करपा खातीर परंपरीक अभ्यासक्रमा सयत हेर अभ्यासक्रम लेगीत शिकपाची गरज आसा. २०२५ मेरेन देशांतल्या १० दशलक्ष लोकांचें डिजीटल स्किलींग करपाचें इन्फोसीसचें उद्दिश्ट आसा. विद्यालयांक टॅब्लेटचें वांटप हो ह्याच उद्दिश्टाचो भाग आसा, अशें डॉ. सावंत हांणी सांगलें.
कार्यावळीक शिक्षण सचिव प्रसाद लालयेंकार, शिक्षण संचालक शैलेश झिंगडे, इन्फोसीस लिमिटेडचे अधिकारी संतोश अनंतपुरा हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
