भांगरभूंय | प्रतिनिधी
आग्रा, खबरां संस्था: आग्रा शारांत एक धक्को दिवपी घडणूक घडल्या. एके सरकारी शाळेंतले शिक्षिकेक चार- चार वरां मेरेन डिजिटल अरेस्ट दवरिल्ली. आरोपीन पुलिसांचो युनिफॉर्म घालून ते बायलेक व्हॉट्सऍप कॉल केलो. उपरांत तांणी ते बायलेक अशें कितें सांगलें. जाका लागून ते बायलेक आपलो जीव वगडावचो पडलो.
ते बायलेक आरोपीन व्हॉट्सऍप कॉल केलो. उपरांत तुमचे चलयेक सेक्स रॅकेटांत धरल्या. जर तिका सोडोवपाची आसल्या १५ मिनटांत १ लाख रुपया धाडात. ना जाल्यार तुजे चलयेचो व्हिडिओ व्हायरल करतले, अशी धमकी दिली. उपरांत आरोपीन चलयेचो आवाजूय ते बायलेक आयकयलो. तातूंत ताची चली ‘आई म्हाका वाचय’’ अशें म्हणटा ती व्हॉयस नोट आयकयली.
आरोपीची धमकी आयकून शिक्षिकेक बरोच व्हड धपको बसलो. उपरांत कुटुंबीयांनी तिका हॉस्पिटलांत दाखल केली. मात थंय तपासणे उपरांत डॉक्टरांनी तिका मरण आयिल्ल्याचें सांगलें. मालती वर्मा (५८) अशें हे शिक्षीकेचें नांव. ही बायल एके सरकारी शाळेंत शिक्षिका म्हणून काम करता. तशेंच हे घडणुके उपरांत ह्या कुटुंबियां मदीं ताणाचें वातावरण आशिल्लें. पुलिसांनी रोखडीच हे घडणुकेची चवकशी सुरू केली.
हे विशीं ते बायलेच्या पुतान ताचे आईन ताका फोनाचेर सगळी घडणूक सांगिल्लीं अशें सांगलें. मजगतीं,आरोपीन तिचे कडेन एक लाख रुपया मागिल्ले. तशेंच, फोनाचो कोड +९२ सुरू जाता. जो पाकिस्तानाचो आसा. एसीपी मयंत तिवारी हांणी, ३० सप्टेंबराक बायलेक मरण आयलें आनी बिरेस्तारा हे विशीं कुटुंबियांनी कागाळ नोंद केल्ली. हे विशीं खर चवकशी करतले. तशेंच फुडली कारवायूय करतले अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
