भांगरभूंय | प्रतिनिधी
मुख्यमंत्रीः धावी, बारावे उपरांत शिक्षकांनी तांकां मार्गदर्शन करचें
भांगरभूंय । प्रतिनिधी
पणजीः बरी नोकरी मेळयतलो जाल्यार उण्यांत उणें पदव्युत्तर मेरेन तरी शिकचें. तांकां फुडें तांचे आवडीचें शिक्षण घेवपा खातीर शिक्षकांनी मार्गदर्शन करचें, अशें मुख्यमंत्री डॉ. प्रमोद सावंत हांणी सांगलें.
भारतीय जनता पक्षाच्या शिक्षक विभागान उत्कृश्ट सेवा दिवपी शिक्षिकांचो भोवमान सुवाळो घडोवन हाडिल्लो. मुख्यमंत्री डॉ. सावंत हांचे हस्तुकीं तांचो भोवमान केलो. त्या वेळार ते शिक्षकांक मार्गदर्शन करताले. ह्या वेळार भाजप गोंय प्रदेशाध्यक्ष आनी राज्यसभा खासदार सदानंद शेट तानावडे, भाजपाचे सरचिटणीस दामू नायक, गोंय शिक्षण उदरगत म्हामंडळाचे अध्यक्ष गोविंद पर्वतकार आनी शिक्षक विभागाचे समन्वयक बाबाजी सावंत उपस्थीत आशिल्ले.
खूबश्या शाळांचो निकाल 100 टक्के लागता, पूण त्या 80 टक्के भुरग्यांक नोकरी मेळनाजाल्यार ताचो उपेग कितें? ह्या भुरग्यांचे कुशळटायेची उदरगत करपाक जाय. वाणिज्य शिकिल्लें चली आपले कडेन नर्शीचे नोकरे खातीर आयिल्लें. आपणे ताका धावेची टक्केवारी विचारली. ताणें 82 टक्के, अशी जाप दिली. विज्ञान फाट्यांत कित्याक प्रवेश घेवंक ना, आपणे परतून प्रस्न केलो. ताणें सांगलें आपल्याक गणिताचो भंय दिसता हे खातीर विज्ञान फांट्यांत प्रवेश घेवंक ना. जर शिक्षकान ताका योग्य मार्गदर्शन केल्लें जाल्यार तें बीएसी नर्सींग करपाक शकतालें, अशें मुख्यमंत्र्यान सांगलें.
फक्त मुख्यमंत्र्यांची जापसालदारकी म्हूण रावूं नाकात. शिक्षकांनी 10 वी आनी 12वी पास जावपी विद्यार्थ्यांक मार्गदर्शन करून तांकां कितें जावपाक जाय हें विचारप गरजेचें. पर्यटन मळार भुरग्यांचे कुशळटायेची उदरगत करून तांकां पदवी सयत फ्रंट ऑफीस ही पदविका घेवपाक लायत जाल्यार तांकां आपसूक ह्या मळार नोकरी मेळपाक शकता, अशी म्हायती मुख्यमंत्र्यान दिली.
ताज सिदाद दे गोवा ह्या हॉटेलांत सरबराय आनी सिप्ला ही कंपनी फार्मा पदवी अभ्यासक्रम चलयता. अभ्याक्रम चालू आसतना तांकां मानधन लेगीत दिता. पूण दुख्खाची गजाल म्हणल्यार चडशे गोंया भायले हें शिक्षण घेतात. बीएसी फार्मा ह्या अभ्यासक्रमांत फक्त पांचूच गोंयकार, बाकीचे सगळे गोंया भायले, अशी खंत मुख्यमंत्र्यान उक्तायली. शिक्षकांनी नवी करियर संद आनी संसोधनाचेर अभ्यास करपाक सुरू करचो. गोंयांत अर्थीक नियोजन करपाचे उणाव आसा. नविनता आनी संसोधन मळार तशेंच पर्यटन सरबराय मळार इतल्यो संदी आसून लेगीत खूब उण्या प्रमाणांत हाका पसंती मेळटा, अशें मुख्यमंत्री डॉ. सावंत हांणी सांगलें.
कोंकणींत अनुवादक मेळना…
आमची कोंकणी भास आठव्या परिशिश्टांत आयली, पूण हे भाशेंत आमकां अनुवादक मेळप कुस्तार जालां. लोकसभा आनी राज्यसभेंत अनुवादकां खातीर जायरात उजवाडाक हाडिल्ली तरी लेगीत आमकां पांचा मदलो एकूच अनुवादक मेळ्ळा, अशी गजाल मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
